絲絲講場：永隆發迹史搬上舞台？

眾所周知永隆銀行係香港嘅老牌銀行，早於一九三三年就在港開業，當年叫做「永隆銀號」。三、四十年代香港嘅政治同經濟環境非常動盪，但永隆銀行喺創辦人伍氏家族嘅努力下，最終都迎難而上，愈做愈大，明年仲踏入八十五周年添，真係典型嘅香港奮鬥史！

出錢贊助 劇本背景相似

咁啱《我們的故事》劇本所講嘅背景係一九四○年代香港，又係以銀舖家族為故事主幹，當中都描述咗香港銀行業嘅發展，可謂同永隆銀行嘅成長背景不謀而合！

據聞除咗因為背景相似之外，劇本最後一幕講述主人翁嘅小朋友於一九四九年中秋節出生，永隆銀行都覺得呢個橋段好有意思。點解？因為係中華人民共和國成立後嘅第一個中秋節，而今個月正值「七一」回歸，所以永隆銀行就認為值得贊助呢齣話劇喇。

首演當晚，永隆銀行常務董事兼行政總裁朱琦拉大隊同一班高層出席，同時都邀請咗一班客戶齊齊欣賞，聽講好多都係幫襯咗永隆銀行好多年嘅老主顧，相信呢班客戶睇到呢齣劇都有唔少感觸。

余絲韻