孖妹S檔案：扑中潛力股 話咁易食胡

基本分析派：恒指難測 A股料跑贏

黎：時富金融優越投資服務部顧問 黎永良

彩兒：我唔少姊妹上半年炒股成績都夠佢哋今年收爐，但你知啦，贏開有條路，邊會甘心收手吖。

黎：下半年港股走勢，我有少少保留，特朗普上任後蜜月期過咗，道指似欠上升動力，納指有沽壓，臨近半年結，基金經理有粉飾櫥窗活動，環球投資者趁機沽貨，展望下半年，美股冇力上，不利港股走勢，美國會加息、縮表等，對經濟前景有負面影響，當然對港股都有影響。港股走勢難估，因未來半年全球經濟同政治因素會牽住港股走勢行，若外圍同中國都向好，恒指可上試27,700點；若情況相反，可能會喺25,000至26,000點徘徊。

我覺得A股可跑贏全球其他大股市，中國經濟架構轉型，由供給側轉向需求側，內地企業會有外資垂青，且內地管理機構早前對內地股市規範化，將班大媽分門別類，限制買賣ST股、認股證同埋期權，MSCI將A股納入新興市場指數情況仲比預期好，相信事件會成為中央嘅激發點，將A股開放，鑑於A股唔係開放市場，相信資金會轉投H股，從而利好港股走勢。

時富金融黎永良預計，電競及人工智能這兩個板塊未來會跑贏大市。

南方A50近期發力

Razer值博 A股ETF搶眼

Kitty：睇嚟你係A股好友，有乜揀股心水？

黎：電競品牌Razer（雷蛇）計劃最快十月上市，有望成為香港第一隻電競概念股，佢係業界翹楚，職業玩家係佢主要目標顧客。電競、AI人工智能等都係大勢所趨，記得佢上市要認購，預計呢兩個板塊未來會跑贏大市。

A股出年正式入摩，部分基金冇QFII（合格境外機構投資者）額度，又或者唔可以直接投資A股嘅話，就會轉投港股市場，成交多、多人留意嘅A股ETF會係佢哋目標之一，我亦睇好入摩指數股。因應內地供給側轉向需求側國策，我相信對同網購公司有合營嘅零售股會開始有成效。

彩兒：睇嚟X安碩A50中國（02823）、南方A50（02822）、華夏滬深三百（03188）等會係大熱。

技術分析派：煲強勢股 必吼科網

盧：興證國際證券客戶投資組副總裁 盧駿匡

Kitty：恒指上半年升咗近四千點，格局會唔會係先甜後苦？

盧：我用線圖睇，恒指確有超買現象，有回落趨勢，相信七月有機會開始出現大調整，呢次調整或者會過千點，但你哋唔使太擔心，大調整後應會出現強勁反彈，有機會上破今年高位，我覺得全年高位仲未出現，整體大市勢頭好，我相信會向三萬點進發，下半年高位會喺29,000至30,000點之間。

如果係勤力嘅股友，不妨趁回調撈貨，上半年強勢股好似科網、賭業股等下半年會繼續強，總之，策略都應該向強勢股埋手。我留意到Razer（雷蛇）下半年會上市，會有利手遊股走勢，其中騰訊就唔使講啦，仲有隻IGG（00799）都有做手遊，預佢哋Keep住強勢。騰訊每次相對強弱指數（RSI）跌到去30樓下都會出現反彈，係理想入市水平，如果有咁嘅良機，記得睇位入。

興證盧駿匡認為，恒指全年高位還未出現。

深圳控股走勢波動

大灣區內房揀深控

彩兒：強勢股就唔使講啦，佢哋已經係我班姊妹嘅寵兒，有冇啲潛力新寵？

盧：你哋都幾高要求喎！我覺得可以留意大灣區概念股，因為中央提出要推動內地同港澳深化合作，區內會有好多發展同新計劃，嗱，雖然近期多隻內房股做好，但大灣區概念嘅內房股未升，其中深圳控股（00604）喺深圳有眾多土地儲備，價值尚未浮現，佢處於一浪高於一浪格局，每次跌穿250日線都會出現反彈，並創出新高，顧及今年五月份同三月份都出現過咁嘅情況，我預計佢走勢會重複，今年有機會再創新高，現時250日線水平約係3.3元，呢個位相當值博。

另一隻內房股走勢比深控更靚仔，佢就係雅居樂集團（03383），佢近期每升一大段就會做一個平台再升，雖然佢累積升幅已經好多，但係近期走勢唔錯，距離50日線唔遠，一旦回落至6.78元可考慮買入，未來有機會上破7.86元，止蝕位可定於上次浪底5.93元。

實戰派：新城發展勁過萬達

梁：中匯資本投資負責人員 梁柏樺

彩兒：冇見你一排，又精靈咗，轉咗去中資行，會唔會揀股Taste唔同咗？

梁：下半年我特別睇好隻新城發展控股（01030），香港股友唔太熟佢，但其實佢同內地龍頭萬達比，佢簽單合約仲勁呀，喺香港上市嘅內房股之中，今年頭5個月佢係排頭10位，累計合約銷售金額約411.75億元人民幣，我預計今年可以過千億元人民幣，比起好多二、三線內房股，好似中國奧園（03883）等好好多。新城發展「麵粉」成本控制出色，利潤率相對高，北水相當鍾意炒，可等2.85元買入，睇3.2元，止蝕位定2.7元。

中匯資本梁柏樺看好海通證券業務前景。

新城發展愈闖愈高

雅各臣1.8元不妨入

梁：另一方面，A股吽咗咁耐，出年終於入MSCI新興市場指數，相信會激活番股市，帶挈港股最少見28,000點，內地股市生猛番，有機會成為內地券商股嘅催化劑，收入勢可受惠成交增加，其中有分拆概念嘅海通證券（06837）做大客多，行政成本較主力做散客嘅券商少，融資業務盈利能力佳，可以喺12.6元買入，上望14元，止蝕位11.8元。

Kitty：果然揀股都情傾中資股啊？

梁：有「香港概念」嘅雅各臣科研製藥（02633），我都好鍾意，佢旗下產品有保濟丸、秀碧除疤膏等，你同我都識，其實公司管理層一向喺併購活動方面都好活躍，仲講到明只收購有盈利嘅項目，上市唔夠一年做咗多宗收購，相信效益會喺今年業績反映到；公司未來都會推自家產品，包括乙肝、心臟藥物，有助提升毛利率，不妨等1.8元買入，目標價2.2元，止蝕位1.65元。

Kitty、彩兒