Market Insight：鋼鐵股具上升空間

事實上，近日一眾內地基建相關股早已起動，中國中鐵（00390）、中國鐵建（01186）及中交建（01800）近日跌至低位亦見回穩；而受惠於內地公私營合作（PPP）項目加快的中國建築（03311），昨日大彈近4%；至於近日被大行看好的鋼鐵板塊如鞍鋼股份（00347）及馬鋼（00323）則分別升5%及7%，值得多加關注。

大行薦買馬鋼

基本面方面，雖然鋼材價格在上半年有所回落，但受惠於清除「地條鋼」等落後產能、環保限產升級及持續去產能改革等國策，馬鋼及鞍鋼等大型企業最能受惠。

大行普遍對行業前景睇法亦趨正面，高盛發表研究報告，重申馬鋼的買入評級，並預期集團次季業績續強勁，目標價3.3元。大摩則認為，今年下半年開始進入工程旺季，故即使房策持續收緊，預期需求仍會維持在健康水平，而在原材料股中，則首選中國鋁業（02600）及馬鋼，皆予「增持」投資評級。

走勢上，馬鋼五月中至今在2.7至2.98元水平橫行上落，昨日破位而上，升7.3%報3.05元，加上成交大增配合升勢，若後市成功挑戰前高位3.18元，料另有新天地。

至於鞍鋼走勢更強，已上破短期橫行區上方阻力及100日線，MACD牛叉擴闊，上升空間較大，要見首站目標5.9元應無難度，跌穿5.3元止蝕。

比亞迪電子調整未完

講完股仔，又講番吓昨日個市。唔知係咪股仔風暴引發部分炒作資金避走，大市氣氛轉弱，恒指跌逾百點，收報25,683點。先前強勢的手機股亦現顯著調整，其中比亞迪電子（00285）一度急插兩成至14元，埋單都要跌近一成，收報16.08元，成交達9.34億元，乃今年二月大升浪以來最大幅度的調整，且成交放量，明顯有資金離場，短線反彈上唔番17元樓上，都係逢反彈減持為妙。

至於昨日提到有機會「染藍」的舜宇光學（02382），昨亦跌4%，失守70元關報69.1元。睇走勢暫可以調整看待，想候低收集的話，睇吓今轉有冇機會喺65元邊落注。

股仔重創有排醫

前日股仔洗倉過後，昨日仍未見有似樣反彈，似乎某莊家系股份已受重傷，有排醫。部分主板股仔跌到得番一億幾市值，仲低過殼價，反映過去有啲股仔不務正業「圍飛作歹」，依家冇咗莊家護航，就要以「真身」示人。

短炒要量力而為

總而言之，投資者入市量力而為，明知有啲股仔喪炒風險極高仍要犯險，輸錢走亦係自己攞嚟。

「翠如BB」聯旺集團（08217）前日股價跌近九成後，昨一度彈近九成見2.01元，惟勢頭短暫，好快倒跌，落過0.75元，收報0.89元。

不過，睇市值都仲有11億元，再跌幾多先至合理，古勝都冇興趣知，反正呢隻股先前過百億市值的估值根本缺乏基本因素支持，純靠供需來支撐超高估值的做法不可長，現在入場短炒的亦不過係慳咗「過大海」張船票，同賭大細無異！

古勝