絲絲講場：科企員工多數唔Like CEO

美國求職網站Glassdoor公布一年一度CEO（行政總裁）排名榜，由員工以匿名身份為公司CEO評分，選出人氣最高嘅100位CEO。點知，硅谷各大科技巨企話事人大部分都表現麻麻。

平日曝光率勁高人稱嘅「Ironman」嘅馬斯克，佢身兼Tesla（特斯拉）與SpaceX舵手，只係排第8位；至於Facebook朱克伯格就由去年第4跌到落今年得第10，勉強叫做入十大。其他科企大佬亦大墮後，好似微軟納德拉就排第29，Apple庫克仲排到第53位添！

至於排名第一嘅係多勒，多勒係邊位？佢公司你應該有聽過，就係家庭清潔用品製造商Clorox，冇錯，就係出你洗手間樽漂白水嗰間。

絲絲最想知，呢個月剛剛畀董事會逼宮黯然同公司拜拜嘅Uber創辦人兼「前」CEO卡蘭尼克又點？原來佢連榜都入唔到！咦，早兩日乜唔係話差不多一成Uber員工聯署話撐佢復職嘅咩？

余絲韻