Market Insight：港股A股化散戶要識炒

股價無可能長期違反地心吸力，中國恒大（03333）、融創中國（01918）經歷井噴式爆升過後，內地資金飽食遠颺，趁內地首五個月固定投資增速遜預期，昨日都有顯著調整，恒大急插11.2%收14.18元，融創創完15.7元歷史新高後，昨倒跌7.1%收報14.28元。

港股A股化是不爭的事實，兩市互通之後，愈來愈更多莊家南下搵食，貪的就是港股沒有漲跌停板機制，可以放手去做，唔使吓吓就住就住。之前呢類暴升股，一班本地老朋友已慨嘆要靠邊站，內地莊家勝在財雄勢大，睇準外資同本地薑天真地講基本因素，忘記股市有句叫「本大無輸」，專攻空得最重倉股份，挾到你棄械投降，就算大隻如藍籌吉利汽車（00175），在足夠資金推動，一樣可以炒到二、三線股咁。縱使在唔平的股價基礎上，仍可一個月再推高五成。

一雞死一雞鳴，恒大、融創抖氣都無有怕，散戶就勝在沒有基金經理的包袱，呢期吼實沽空名單，只要沽空足夠，另一邊廂又見港股通名單一邊密密入貨，咁就要留神。話時話，唔知幾時輪到中資重倉的神州控股（00861）、上海電氣（02727）等股發力呢？

網龍打好底似開車

科技股插過一輪又見炒作，昨日騰訊（00700）帶住IGG（00799）、金蝶國際（00268）以及金山軟件（03888）向上，古勝反而留意到啱出業績，虧損收窄的網龍（00777）。

一來係在今浪科技股的升浪之中，網龍幾乎完全絕緣，其股價由舊年十月高位29.2元，級級落，到近排在20至21元之間完成打底，短線似有開車動作。

網龍首季遊戲業務收入按年增長四成，表現唔錯，可惜教育業務方面處於起步階段，影響業績。近期狙擊機構肆虐，買科技股最驚被沽空機構唱衰，網龍老總都幾有趣，唔等淡友搵上門，七月公司會開一個重大發布會，邀請分析員同傳媒出席，等大家對產品多啲了解。

中資科技界大佬之中，肯咁做的真係唔多，單呢一點都值得捧吓場。

股市大玩擲公字遊戲

聯儲局加息幾無懸念，難得「特式升市」已見死火，華爾街依然一臉樂觀，創住新高迎接海嘯後第四輪加息的到臨。

查實由十年期美國國債孳息過去三個月級級落，從2.61厘縮落2.2厘水平，對美國經濟數據唔算特別標青，物價上漲壓力唔大，債商春江水暖，老早反應把資金調撥回到債市。

債商當聯儲無牙老虎

近兩個月，一眾永續及垃圾債券市場升到爆燈，預示聯儲局的利率正常化猶如無牙老虎，惡極有限。

利率期貨顯示，到今年底最後一次議息，息口企喺1至1.25厘的機會率有49.8%，如果今晨加一個骨的話，簡單講，即係去到年底聯儲局都無機會再出手，至於上多一格，去到1.25至1.5厘僅得38.9%機會，是未成氣候。

弔詭是，資金回流債市，股市卻沒有泛起一絲漣漪，只得科技股出現短暫震盪，可見殺得性起的華爾街都相信自己玩緊「公我贏、字你輸」的遊戲，如果年底前再加息，表示經濟理想，股市當然要炒，如果未來數據轉弱，咁過去四次（包埋今次）加息，不過純綷為未來經濟再度轉弱時，掉頭減息提供空間。當美股主流想法如此，都咪話唔得人驚。

古勝