絲絲講場:卸妝App誘惑投資者

一App在手,人人變女神,就係咁,美圖公司(01357)受盡投資市場關注,依家市值388億。不過,依家倒轉玩先夠爆,有公司出咗個具「卸妝」功能嘅修圖App叫「MAKEAPP」,近日網上爆紅!

MAKEAPP可以為相中人模擬「上妝」或「卸妝」,重點當然係「卸妝」功能。想睇邊位嘅素顏效果?可以無情玩盡情試,冇晒眼線紅唇,女神即刻變大媽。

一個月下載量過萬

呢個堪稱「女神剋星」嘅App推出約一個月,下載量已經以萬計。查實開發商Magic Unicorn連埋今次個MAKEAPP在內,只推過兩款App,不過公司網站已經設有專供投資者聯絡使用嘅專屬電郵,擺明想引入投資者。

宏匯證券研究部主管林嘉麒話「想得出P圖卸妝,其實都幾有創意,但要將噱頭轉化為商業模式,又未必係咁易!」佢話呢類P圖軟件就算勁有人氣,收入模式亦都要時間印證。

素顏,唔知創投基金吼唔吼呢?

余絲韻