我真係好鍾意炒股呢份工，尤其是帶住幾百人出出入入，長驅直進上到嚟26,000點呢個moment，嗰種興奮的感覺真係high到喊出嚟！
炒股另一個吸引人的地方，是在於佢千變萬化，鑊鑊新鮮，鑊鑊新奇。好似最近的沽空機構報告咁，真係好睇過好多大台的膠劇。尤其是昨日渾水（Muddy Waters）主席Carson Block向傳媒發話，預告今日發動新的攻勢去狙擊某隻港股後，全城開始大猜啞謎，有人估敏華控股（01999），有人估通達集團（00698），雙方於牌面上勢均力敵。
敏華的純利率高達40%以上，同瑞聲科技（02018）有得揮，加上市值又夠大，好惹人遐想。至於通達，自配股消息傳出後基本上無好過，加上早前有傳畀人甩單，雖然未知係邊個傳消息出嚟，但諗深一層，話唔定係渾水放風試下市場的反應喎！
唔理點都好啦，雖然花落誰家要到了今日至知分曉，但市場一於就先沽為敬喇，股價雙雙大跌，就看看誰可以於今日甩難反彈啦！
所謂世事如棋就局局新，太多戲睇就唔夠花生。一波都未平，另一波又起。今次加入戰團的是匿名（Anonymous Analytics），他們於上日堂而皇之地走出來話「Hong Kong deserves a better hero」同時力撐瑞聲並調高公司的目標價到111元，又話強烈買入喎，分明係揶揄先前唱淡的Gotham City（又稱「蝙蝠俠」）無料到，依家當面挑機啦！實在係太刺激喇，我以為自己睇緊Marvel的《英雄內戰》囉，兩個超人打埋一舊喎，仲唔係百年難得一遇？
不過，我想問若今次係由匿名成功證明蝙蝠俠的報告是有偏頗、有誤導的話，咁以後班股民畀人魚肉一番，等復仇者聯盟出來打救就得啦，仲使乜要證監呀？
富昌金融研究部總監 譚朗蔚（作者為註冊持牌人士，持有瑞聲）