北水頭等倉：天津創環博財息兼收
「一帶一路」國際峰會兩日會期開埋今日，有心理準備本周港股或須先行整固。事實上，恒指自四月中旬23,700點水平反覆升至近日高位25,200點水平，要抖抖氣先再上都正常。不過，今年魚缸「五不窮」，筆者擔心次季高位已不遠矣。在次季經濟數據轉弱之下，六、七月股市好可能進行會調整！
講到「一帶一路」國際峰會，本來並無西方大國代表出席略為失色，誰知上周五傳來特朗普政府指中國已同意向美國信用評級機構及信用卡公司開放市場，並恢復進口美國牛肉，故美國將派代表團參加北京的「一帶一路」國際峰會，而中國則會派代表團參加七月在美國舉辦的一個投資者會，真正禮尚往來！
互聯互通惠及滙控
日本見大佬都出席畀面派對，安倍都唔執輸派代表出席。所以話，今時今日中國的影響力，真係唔簡單。早前筆者就話，當大家以為特朗普會向中國強硬，中美關係會轉差，實際上，呢位大賭徒就會施展莊家本色，圍骰通殺，喺佢在任期間，中美關係好可能係前所未有咁好！
北水愛股滙豐控股（00005）自四月下旬61.8元，以密集式陽燭不斷攀升，上周五股價位見68.25元，小股東真係飲得杯落。股價表現佳，除咗因為經營數據有驚喜之外，流通量減少亦不無原因，一則公司多次回購，二則花紙顯示，單係互聯互通北水喺滙控持倉數目已達到5.9億股，佔已發行股份2.89%，兩者力量加埋起到貨源歸邊的作用。
中資股方面，見到天津創業環保（01065）股價上周五平咗上月二十七日所創的52周高5.44元，收報5.41元，升6.3%，成交9,589萬元。公司派發末期息每股9分人民幣將於下周一除淨。咪理係咪掹車邊炒雄安概念，齋睇個勢都唔錯，就小注博破位兼食埋息，上望5.8至6元區域，回吐宜守穩5.2元。
司慕渢