絲絲講場:窩輪「四大美人」介紹你識

想睇吓今周有乜新輪上市,竟然畀絲絲見到「四大美人」!(唔係講緊輪后),仲有「IG」。乜社交網絡平台Instagram有上市咩?

中文簡稱只容兩字

查實係今周陸續上市嘅新輪中,有啲個名比較特別,除咗「IG輪」外,仲有4隻「美人輪」,來自一啲首次畀發行窩輪嘅相關資產。估唔估到佢哋各自買緊咩呢?

港交所對窩輪嘅簡稱有規定,窩輪中文簡稱只能用兩粒字去形容相關資產。好似中國石油化工股份(00386)相關窩輪簡稱用「中化」開頭,中國建材(03323)窩輪就用「國材」開頭,比亞迪股份(01211)窩輪就用「比迪」。所以新推嘅IGG(00799)窩輪好順理成章用「IG」開頭,絕對唔關Instagram事。

至於「美人輪」嘅相關資產就唔係股份,而係美元兌離岸人民幣。外匯輪唔算係市場主流,輪名叫「美人」,大家會否望多眼呢?尋日諗住乘機爆句「今次仲唔係到絲絲上市!」點知上司回句:「怕時間值輸死你喎!」Huh?!

余絲韻