美股納指好似冇頂咁日日升，港股都有多少受惠，反而A股就斯人獨憔悴，皆因中央大喊加強金融監管，班炒家點都要收斂一吓，等風聲冇咁緊先算。反正港股生生性性，唔好畀A股拖咗後腳就好。從恒指牛熊證街貨分布顯示，對上至25,000點的熊仔街貨着實不少，假後屠熊的概率較大。
上周三筆者指是浪會反覆試叩2元關的理士國際（00842），果然冇失拖，上周五股價高見2元，可以食個快餐。早前熱炒的雄安新區概念A股，上周初現較大調整，至上周五才稍有起色。
老實講，與其炒雄安概念，筆者寧可炒作自己較熟悉的粵港澳大灣區概念實在啲，且可供選擇的概念亦唔少，其中以深圳為基地的龍頭科企騰訊（00700），係不折不扣的大灣區概念股，呢期股價迭創新高，有貨底不妨繼續放長線，短線上試250元關應該冇走雞。
再繼續睇吓大價股，中國聯通（00762）上周宣布自五一起大幅調低「一帶一路」區域國際漫遊收費，惟料影響已反映在股價。雖然其首季有線寬帶淨增長率及ARPU均低於預期，但在嚴控成本之下，EBITDA及淨利潤均有增長。
講起聯通，投資者的注意力都放在系內的混改，以及聯同中國移動（00941）及中國電信（00728）共同組建的鐵塔公司上市進展，季內不妨多加留意相關消息。
走勢上，聯通股價四月初因系內混改消息飆過上11.2元後反覆回落至10元邊，周二收報10.06元。筆者維持此股可逢低分注收集的看法，9.5至9.6元乃主要承接區。
司慕渢