Market Insight：百麗趁私有化換貨

重磅強股選擇唔多

反而，瑞聲及舜宇雖然應用高科技，但憧憬點都有個譜，基本上股價經已喺iPhone 8推出前的兩、三季率先炒高，現時估值着實不算便宜，若冇貨就無謂再追，寧願買騰訊。畢竟對芬佬而言，要搵一隻跑贏大市而又有流通量的重磅股，選擇有限，騰訊可以話係不二之選！

百麗國際（01880）大股東鄧氏家族接納由高瓴資本集團、鼎暉投資集團及集團管理團隊所提呈的私有化要約，認為要約切合集團發展。是次私有化提價為每股6.3元，周二百麗復牌升15%，收報6.07元。若然小股東都傾向接納私有化建議，基本上呢啲位都可以畀佢，免卻煩惱。

事實上，如今全球消費模式在急劇轉變，傳統零售鞋業生意難撈，要突破着實不容易。誠如瑞銀報告所講，現時大部分百麗的商店都只有一名員工，成本削減空間十分之有限，盈利有持續下跌的風險。反正暫看不見出路，與其博買家提價，倒不如及早趁機套現另覓目標。

鑊剷細價股注意風險

前稱中國貴金屬的麥盛資本（01194），前日發通告披露業務進展，指自一月起其全資附屬──麥盛深圳的資產管理規模增加至22.8億元人民幣，並指若干投資者已同意對麥盛深圳的基金投資約300億元人民幣，故料今年餘下時間資產管理規模將會繼續大增。

同時，公司又與深圳A股公司合肥百貨（000417.SZ）等公司合組合肥資產管理，擬主要參與合肥市國企混改相關的投資機會；另成立了珠海麥盛資產管理，喺內地從事證券投資基金。

聽到公司有咁多新發展，但以上周五收市價計市值僅10億元，吸引一班炒家落場炒一轉，都唔係冇道理，但沒料到單日可以足足炒高一個開，周二股價收報0.14元，升86%，成交1.8億元。

麥盛前景未明朗

不過，有番咁上下炒齡的鑊剷友，對呢隻股可能會無動於衷，皆因喺○九至一○年大炒過之後，股價跌足咁多年！雖然公司近期都幾多動作，但係咪可以真正搵到賺錢之途，仲係要睇番一、兩個財年業績先至可以下判語，跟風短炒都係自己計自己數，注意風險。

中電新能源暫宜觀望

新能源股都靜咗好一段時間，周二見到中國電力新能源（00735）宣布重組架構方案，擬成立於香港註冊的新公司，全資控股目前上市公司，並以介紹形式上市取代現時公司上市地位，現有股東可以一換一獲取新公司股份，據講此舉目的乃考慮到香港註冊成控股公司發展內地業務，將可受益於「一帶一路」倡議及「更緊密經濟夥伴關係」，而喺處理跨司法權區法律合規方面亦具有成本效益等。

既然咁多好處，何解公司不早早提出重組，確令小股東有點不明所以，會唔會有其他考慮，就留畀大家慢慢估。睇番幅走勢圖，股價自一五年股災後反覆回落至去年中在4元邊找到支持。

由於今次重組公司建議主要股東中電新能源於完成配發後，購入新公司最多一成股份，及配發、發行或處置最多新公司已發行股份總數20%股份，相信短期股價會定住喺現水平，等搞掂晒呢單大嘢，先至知道大方向。

古勝