絲絲講場：IT人有幾豪 睇買乜樓就知

澳洲軟件公司Atlassian共同創辦人Scott Farquhar日前斥7,500萬澳元（約4.368億港元）買咗幢對住悉尼港嘅一八六三年大宅Elaine，破咗澳洲單一住宅成交紀錄。重點係Farquhar今年行年三十八，四十歲都未到！

初創成功率僅得1%

絲絲諗，嗱香港地搞Tech，年薪去到100萬元已經叫唔錯，但講到一幢4.4億元嘅大宅，份收入就算唔食唔着，都怕且要捱成四百年，即係要做五世人，仲要一出世就識得賺錢先夠……

香港Tech人又點睇？香港資訊科技商會榮譽會長方保僑話，呢類IT富豪成功唔係撞手神，佢哋高IQ又肯博先有咁嘅回報，唔少IT奇才冇讀完大學就急急腳創業，其實初創企業成功率只得1%。

「我冇葡萄佢哋o架，行內大把呢啲例子，佢哋有願景，理想又夠宏大！咁我唔識吖嘛，識就做咗富豪啦！」方保僑好謙咁話「可能我唔夠博，又冇做吓KOL博吓，不嬲自己有層樓就安樂，冇恨過住豪宅。」

余絲韻