絲絲講場：亞洲雜貨上市毋忘老舖
呢個係一個香港故事，由屋邨雜貨店做起，兩兄弟拍住上，衝出屋邨面向「亞洲」，講嘅係尋日掛牌嘅糧油食品股亞洲雜貨（08413）。
首掛曾升逾8成
故事由觀塘翠屏邨嘅「鴻發號」雜貨店講起，最初由阿爸黃紹松打理，後來黃少華黃少文接手發大嚟搞，以「鴻發號」為名做埋食品批發供應，尋日上埋市，阿哥黃少華任行政總裁，細佬黃少文任主席。
尋日上市儀式，黃氏家族成員當然齊齊出席，特別係黃老先生，年屆八十有幾，坐住輪椅都專程現身支持，一家幾咁溫馨。
公司特登請人特製送畀聯交所嘅禮物，係一個「鴻發號」迷你模型。唔好睇佢模型細細，入面真係做得好細緻，充滿油光嘅臘肉、海參冬菇等等雜貨，呢間舊式鐵皮檔全部有齊，真係栩栩如生！
公司做到風生水起，首日掛牌亦表現出色，平開後直上雲霄，曾炒高逾八成，收報0.4元，較招股價0.23元高73.91%。香港故事夠勵志嘞啩。
余絲韻