對沖國度:投資唔使問長問短

太多人睇市的時候,過度追尋因果關係,點解會升,又點解呢隻升嗰隻又唔升。自己最怕遇到這些「點解弟弟」,當正投資是科學實驗,糾纏不休。假如市場的行為永遠可以預測可以解釋,就無人教書或者做會計,炒股票好過。

睇市真正的重點在於賠率,睇啱睇錯無所謂,必然是有時贏有時輸,要贏的時候會豐收,輸的時候唔入肉,拉勻有數圍便可以。

要有鍥而不捨精神

最近兩日波幅開始增大,一日跌一日升,不必執着找理由,走勢跟着情緒走,偶然波動很正常。自己依然博向上突破,始終認為好友陣營實力太勁,兼且一連串不明朗因素擺得太明,只要風險逐一移除,上升動力便會增加。

周二晚美股開市時段形勢最惡劣,由於持倉偏高,當時也忍不住酌量減持降低風險,之後見市勢穩定下來,淡友不外如是之後才再追過。一賣一買之間輸了少少,假如反攻不成又跌過,就會摑完一巴又一巴。

炒賣就是要有一種鍥而不捨的精神,才有機會控制風險之餘爭取回報。自己的打法是比較少斬倉,一斬就是密集式連環斬,心理上比常人會更難受,但一樣可以鼓起勇氣轉過頭又入過場,因為是當作做生意有來有往一樣,不會被上一個決定影響下一個決定。

豐盛金融資產管理董事 黃國英(作者為註冊持牌人士)