昨日的清晨一撐大眼，就看到一條聯合航空涉嫌毆打乘客的新聞片，內容簡直係令人咋舌！無睇片的粉絲們，等我介紹番。事緣是聯航超賣了機位，搞到四個人無位坐，該四個人就是聯航的職員囉，聯航為了讓自己人有得飛，竟然想出用抽籤的方式（公道到呢）揀選了四位花真金白銀買票坐飛機的乘客，自願落機騰出空位。
話明是自願的，理應可以揀唔離開吧？但聯航唔係咁諗喎，唔自願離開，咪搵人打橫抬你出去囉！結果，該名乘客慘被人強行拖出，以致血流披面。
事件惹起了全球公憤，尤其是該公司的CEO於回應事件的時候稱該暴行為「重新編配（re-accommodate）座位」，更觸發起網絡上的全面炮轟！
作為一個罹患了職業癌的投資人，第一時間就梗係去睇吓United Continental（聯航的母公司，紐交所上市代號：UAL）的股價有咩反應啦！
截至昨日的下晝四點半為止，股價於盤前跌了3.52%至69美元，都算是有點天理！始終從事服務行業的公司，都應該是以客為本的。如今你讓全世界的人知道你點對班客，以後仲點會有人坐你的飛機喎！
不過，以上的說法就不適用於壟斷型的企業喇，我所指的咪就係港鐵公司（00066）囉！他們的服務質素？人盡皆知啦，信號系統日壞夜壞（無詆毀佢，周一他們不是早上返工壞一次，晚上放工又壞一次？）繁忙時間，故障兩個半小時，所引致的損失點計先？公司於每年提請加價的同時，又有無諗下自己畀啲咩服務香港人呀？
不過，你唔好理，公司股價昨日依然可逆市企穩，一個仙都唔使跌！原因呢？因為佢唔開車啫，無打人呀！講笑咋，咪就係壟斷囉！今早醒來，你咪又係死死哋氣咁迫入去港鐵度！有得揀咩？
富昌金融研究部總監 譚朗蔚（作者為註冊持牌人士）