Market Insight：公路股逆市有睇頭

昨日恒指就下試24,000點支持，相信短期難脫反覆偏軟格局。仍留喺魚缸的，細細注即市炒作異動股還可，大動作可以留待長假後再作部署。

內銀靜待執平貨機會

內銀股呢排唔多精神，昨日四大內銀跌幅均逾1%，皆因傳聞內地監管部門將收緊對內銀的監管。睇番派息資料，四大行派息都要六月下旬至七月初先除淨，有充裕時間質低再來一個浪，所以短期若然想買內銀股的話，唔使心急，相信四、五月應該有機會執到平貨，博半年結前後財息兼收。

此外，公路股江蘇寧滬（00177）昨日股價逆市創52周新高，收報11.3元，升0.89%。公司去年業績同派息都唔錯，每當市況變得波動，呢啲優質公路股能吸引到避險資金流入。

公路股板塊中，深圳高速（00548）去年純利同末期息雙降，上月股價由高位7.9元落過6.83元，昨一度彈上7.33元，最終無升跌，收報7.26元。照計二選一當然係揀強勢的江蘇寧滬，至於深高速股價，短期料維持喺6.8至7.5元水平上落。

地產股短線震盪難免

香港樓價仍然係咁升，港人家庭債務佔GDP比重破紀錄，有足夠理由叫政府動手做嘢，所以近幾個禮拜，個個禮拜五都驚政府有嘢公布，點知昨日傍晚就真係出招。

高樓價非港獨有

其實樓價癲升，唔單止係香港，好似多倫多，上個月樓價按年升逾三成，因溫哥華出招冷卻樓市炒風，啲錢就走晒去多倫多買。

總而言之，現時全世界主要城市的物業投資，需求龐大確係事實，但呢個現象的基礎主要係長期量寬下，市場流動性充裕，利率低企以及貨幣貶值等因素使然，但呢啲因素都正在起變化。

所以如果唔係有迫切自住需要，或者有充裕能力者，真係唔好「舂」個頭埋去，而受政策消息影響，短期地產股有震盪難免，各位睇路！

落注暴跌股如賭大細

上晝早段魚缸都係靜靜局，點知十點有飛來蜢現身！隻中國金控（00875）突然湧現大量沽盤，股價由十點正約0.125元，跌至十點廿七分低見0.019元，最多跌85%。不過，未見呢隻股中途停牌，加上股價跌到落兩、三仙，兩萬股一手，同博末日輪冇咩分別，反正班炒家預咗Double or Nothing，入市博一博冇頻撲。

結果係點？該股下晝真係彈過上0.077元，班散仔真係炒個不易樂乎，難怪見到隻股市值跌到得番5.18億元，但昨日全日成交有6.24億元，成交宗數達到1.45萬宗，真係炒到出煙！

翻查資料，中國金控去年四月宣布發行可換股債券（CB），認購人之一乃深圳市前海阿里基金管理，而發行事宜於去年十一月完成，若第五年獲行使，將成為公司單一大股東。當時該股因此消息曾大炒，但其後有指認購人與大家熟悉的阿里巴巴毫無關係。

睇番權益披露資料，前海阿里於去年十一月廿九日申報持倉股數由27億股變為零，似乎係未有再持有該批CB，但到底係咩一回事，古勝真係一頭霧水。

呢類股仔，平時冇咩消息股價又一直低迷，難以吸引市場目光，係好似昨日咁見到有大型斬倉盤先至會吸引到一班「勇」字行頭的炒家落注賭大細，自問心血少就行埋一邊當睇戲。

古勝