今年農曆新年後樓市又再發威，二手樓價日日創新高，新盤狂加價依然大賣，地產代理自然「肥仔」。美聯集團（01200）就率先同絲絲報喜，話公司一六年全年業績轉虧為盈，喺業績改善情況下，決定向全線後勤及前線員工，發放一七年首季度花紅。
佢哋副主席黃靜怡話，今次花紅平均有0.25個月，最高有0.4個月，之不過展望未來樓市，面對美國加息風險、加辣升溫等不確定因素，地產代理行業仍然有重重挑戰。
另一對手中原地產亞太區今年首季佣金有近13億元，按年勁升105%，佢哋根據盈利花紅發放機制，預計首季會向全線後勤發近1個月花紅，至於今年全線後勤就加薪4%。
余絲韻