絲絲講場：Tesla搶上淡友輸249億
電動車生產商Tesla（特斯拉）股價今年來勁飆逾46%，周一更創出313.73美元新高，市值升到509億美元（約3,970億港元），繼早前超越福特汽車後，再取代通用汽車（GM）成為最大市值嘅美國車廠，不過睇淡佢嘅人就認真慘情，損失可能達32億美元（約249.6億港元）。
Tesla市值升，大贏家當然唔少得舵手馬斯克同埋早前披露買入Tesla約5%股權嘅騰訊控股（00700）。
今年料蝕9.5億美元
不過，有人歡喜有人愁。資料顯示，截至一月底止，Tesla短倉佔已發行股份約35%，呢班淡友估計已損失23億美元，由於之後Tesla股價愈升愈有，有專家估算，計埋周一升幅，淡友損失可能高達32億美元。
詭異嘅係，GM估計今年可賺超過90億美元，福特則料賺約63億美元，反觀Tesla「未止血」，料蝕超過9.5億美元。
首季付運量增69%
無論如何，Tesla近排真係氣勢如虹，今年首季全球付運量勁增69%至破紀錄嘅超過2.5萬輛，有望達到首半年付運量超過5萬輛嘅目標；投資公司派杰周一仲將Tesla目標價大幅上調65%到368美元，股價自然受追捧。
話時話，雖然Tesla日前已經否認將會喺中國廣東設廠，但有報道話Tesla一直想喺大陸生產、想喺上海設廠，選址上海臨港，同上海市政府談判咗已經兩年。
不過，因為Tesla所要求嘅條件太高，所以到依家仍然未能成事。Tesla近期氣勢咁勁，話唔定可以成為該公司同上海方面嘅談判籌碼喎。
余絲韻