Market Insight:煤炭股業績未見頂

自○八年海嘯爆發後,美國印鈔機日夜趕工,成功避過經濟大蕭條,炮製史無前例的全球經濟再膨脹周期,繼退出量寬及加息,終於到收水三部曲最終章,暗示準備縮減資產負債表。

聯儲局收縮資產規模,意味着把多年瘋狂印出來的流動性逐漸收回,萬一真係講得出做得到,後果實在非同小可。單是現時環球發達國家樓價的泡沫,就已經唔知會有咩結局。

海嘯前,聯儲局資產負債表不足1萬億美元,經歷三輪量寬,今年三月底止約為4.46萬億美元水平,十年唔夠翻幾番。美國經濟復甦,聯儲局逐步退出極寬鬆措施,其實一四年底開始資產負債表已停止再上升,可是多得歐、日央行加入鬥印遊戲,環球游資充裕情況絲毫未改。

班水回朝 股市冇運行

折算美元,兩大央行分別花了兩年半與三年時間,把資產負債表推到4.37萬億及4.47萬億美元,與美國聯儲局平分秋色,也接美國棒加入瘋狂放水。

美國真有能力收水?無疑家陣十畫未有一撇,利率正常化講咗N年,到美國全民就業,失業率不足5%預示經濟周期快將完結,至今只係加到三次息咁大把,有兩次仲係趁股債市在Trump rally如癡如醉下出手。查實,美國經濟以金融為主,聯儲局對華爾街投鼠忌器,目前特朗普經濟主張有走數味道,「特」式升市開始洩氣,收水更是知易行難,唔需要太早擔心。不過咁,在班水回朝陰霾下,去年十一月開始的美股升浪,睇怕都好難再走落去。

內房音樂椅遊戲未停

指數牛皮,港股繼續炒股唔炒市,可是資金輪動極快,唔貼市實在好難搵到機會。好似隻中國聯通(00762)母公司推行混改,趁消息股價以52周高位開出,埋單隊到貼近day low收。三月份業績期後一輪炒落後,混改成為大孖沙好消息掟貨的催化劑。

昨日內房股走勢轉強,資金集中炒落後的二三線,融創中國(01918)升8.8%,路勁基建(01098)升6.8%,渝港國際(00613)升5.1%,中國恒大(03333)升3.6%。

今年首三個月一線城市量跌價唔升,反而被芬佬視為利好信號,近排唔少內房高管同分析員吹風,唱緊今浪調控力度見頂的可能,下半年部分地方政府的限價壓力甚至可能無上半年咁緊,大盤買得落力,睇嚟二三線內房短期仲有水位上。睇走勢,古勝較鍾意禹洲地產(01628)、綠城中國(03900)及寶龍地產(01238),唔知啱唔啱大家心水。

兗煤剛破位有力再升

供給側改革見效果,去年煤炭業行營收狀況大反彈。兗州煤業(01171)前年比較基數極低,去年盈利勁升9倍賺16.49億元人仔,高管預測,內地煤價升浪未止,預料會到今年第三季先會見頂。加上銷售成本回落,變相預告一七年業績有條件更上一層樓。

昨日借發債消息,兗煤股價破6.65元三頂阻力,升4.1%收報6.83元,上望阻力講緊7.6元及港股大時代高位10.4元。行業復甦,一七年市盈率仍然停留單位數字,加埋啱啱破位,短期有留意必要。

古勝