絲絲講場：摩通7億大刁手機搞掂

唔係講笑，今時今日真係揸部手機就十億八億上落！摩根大通周二嘅高層致股東信上，自爆佢哋最近有單高達1億美元（約7.8億港元）外匯大刁，就係齋經手機「落注」搞掂！

就因為手機太方便，摩通行政總裁戴蒙周二喺公開場合講笑話，未來嘅金融創新技術，可能就係點樣確保啲人唔會因為飲大兩杯就亂做交易咁話。

戴蒙話：「可能有一日我哋要喺手機度裝個酒精呼氣測試機，當你食飽飲多兩杯High咗，突忽發奇想『我要買日圓！』」，就要對住部手機「吹波仔」先，以免一失足成千古恨。戴蒙仲當眾扮「吹波仔」，全場爆笑。

話時話，英國脫歐公投前曾警告可能會將4,000個職位調離英國嘅戴蒙，周二喺致股東信中「轉軚」話未來兩年唔會調走好多職位喎。

余絲韻