內地的經濟增長點解可以年年都維持於高單位數字的呢？別誤會，我今日並不是要講數據有水分，而是讚嘆「中國的版圖遼闊，地大物博，人口眾多，發展一日千里！」以上是我讀小學時社會科的老師教我的。
今日，我又有一番新體會喇。事緣中央於上周六「點燈」，而今次被寵幸的就是包含雄縣、容城同安新三縣的雄安新區。其實，中央於過去幾年都不是無點過新區的，市場的反應之所以咁大，是源於中央有意將該區打造成同滬深可以媲美的經濟特區，滬深不單只是大市，還要是金融中心呢！
有人話，雄安新區的地理位置是處於北京、天津同石家莊（京津冀）這個鐵三角之間，好運的話，隨時可以升格成為北京以外的副首都喎。
但又有人話，該區目前只不過是荒蕪一片，要發展至摩登城市的級別，淨搞硬件都起碼三、五、七年，使唔使high成咁呀？
你有所不知喇，香港的股民周一將隻金隅股份（02009）炒到上天，升成34%其實係碎料嚟。內地來自不同省市的居民聞風湧至，於六小時內把雄縣的房價炒高四倍至稱得上係大製作！炒到中央政府於一夜之間喊停該區所有的物業轉讓，還要全市的物業代理關門停業添，認真浮誇！
因此，金隅升足成個交易日至升到34%咁大把，其實係好小兒科的一件事！適逢內地股市於周一放清明節假，北水未至，港股先行，一些只係升得十幾個百分點，但是成交額激增的滬深港通股份，就好似天津港發展（03382）咁吖，閒時得幾百萬的成交額，忽然間變過億，想必都是提早落鑊，博大媽於今日復市就來搶啫！該股於突破1.38元的阻力後往上看1.65元同1.85元的目標，或揸到成交縮減為止。
富昌金融研究部總監 譚朗蔚（作者為註冊持牌人士，本人及客戶持有天津港發展 ）