絲絲講場：股神愛可樂出晒面

中國推櫻桃味限定版

股神巴菲特鍾情可口可樂人所皆知，尤其係櫻桃味，公開場合不時見佢拎住可樂飲，聽講佢日飲5罐，今年86歲嘅佢講過「唔通我轉飲水同食椰菜花，就會長命百歲咩？」

見股神咁愛，可口可樂喺中國推出特別版櫻桃味可樂，罐身印埋巴菲特嘅卡通嘜頭。

巴菲特啲中國粉絲唔單止參考佢嘅投資策略，甚至豪掟幾百萬競投股神每年一度慈善午餐。近年有以千計中國人飛去美國參加股神投資旗艦巴郡股東會議，搞到股東會去年開始提供普通話即時傳譯。

推股神可樂，可口可樂市場總監Shelly Lin話，對巴菲特肯接受呢個提議覺得好Surprised。計絲絲話，對巴菲特與可口可樂絕對係雙贏，可口可樂最大股東就係巴郡，巴菲特本人亦持有可口可樂股份超過四分之一世紀。

幾時有？根據可口可樂網頁，櫻桃味可樂喺三月十日已於亞洲推出，至於股神特別版就只於限定時間推，賣完即止。絲絲聽講，巴郡五月股東會上亦有機會買到。

余絲韻