孖妹Ｓ檔案：特朗普牛市Game Over？

9月前承諾無影 美股隨時跌一成

潘：富邦（香港）投資策略及研究部主管 潘國光

彩兒：「侵侵」做咗總統兩個幾月，當初市場視佢上任為黑天鵝，搞到好多投行同金融機構都怕咗佢，仲估計佢一旦當選，美股會大跌6至10%、美元會貶值、拖低美債息率，點知佢喺一地眼鏡碎之下坐上總統個位，市場憧憬佢大力推基建、減稅等刺激經濟政策，令當時高唱入雲嘅特朗普危機不單只冇出現，仲出現咗特朗普牛市添，唔通依家牛市夢完之餘，仲要進入特朗普危機嘅噩夢？

月底見首個觸發點

潘：佢上任時大家唔睇好，最終個市仲升有幾個原因：第一，個Market對佢嘅政策有期望，諗住佢會增加開支，推高增長同通脹，亦有刺激經濟嘅基建開支同減稅，最初覺得佢好民粹，但最終投資者解讀為利好事件。舊年十一月八日至今，美股連番創新高，目前只係由高位調整約2%，但美債10年期同30年期債息舊年十二月已見頂，以10年期為例，舊年十二月頂位係2.64%，近日去番2.40%，債息已回落；美匯指數年初亦見頂，高位為104左右，近日曾跌穿99，「特朗普升市」係基於投資者對白宮政策嘅憧憬，喺十二月時，債市開始有質疑，匯市喺一月都開始懷疑啲刺激政策最終係咪受阻。

股市唔肯回，係因為股市同債市、匯市嘅投資者未必係同一類，後兩個市場主要係由機構投資者參與，前者就有較多散戶在場，一般機構投資者較理性、對政治事件較敏感，散戶見市升就跟買，未必諗得咁仔細。

Kitty：唉，都唔知美國國會之後會唔會打大交，搞到拖冧美市，以至港股添！

潘：有啲日子要注意，會掀起股市波動，第一個觸發點係四月廿八日，因債務上限原故，國會撥款開支法案會喺當日屆滿，若當日國會仲拗緊醫改或稅改法案等，國會多方勢力未能達成共識，國會就要停運。第二個觸發點係五月廿二日，之前奧巴馬年代嘅醫改補貼會喺當日到期，到時政府好大機會唔再向奧巴馬醫改提供補貼，愈來愈多保險公司退出計劃，整個措施有機會瓦解，前提係特朗普醫改過唔到關，等奧巴馬醫改瓦解係佢底牌。

高沽低揸指數產品

潘：美國債務上限問題拖到六、七月都一定要解決，到時會同稅改、出年嘅財政預算一齊傾，所以早前過唔到嘅醫改法案只係前菜，國會民主、共和兩黨已有唔同意見，美國眾議院議長瑞安同侵侵喺稅改上又有大分歧，醫改過唔到關，特朗普政府喺補貼上已少咗筆收入，若再推唔到邊境稅嘅話，又少一舊收入，到時減稅嘅幅度就會細咗，到八、九月可推稅改，市場預期企業稅由35%削至20%，但最終有可能減得5至10個百分點，個人稅有機會拖到出年年頭先有得傾。

Kitty：侵侵再硬頸落去，睇怕會親手終止「特朗普牛市」，再會累到環球股市都一鑊泡喎。

潘：國家主席習近平本周同特朗普會晤，到時若傾到中美貿易，或者會影響到中港經濟，出口股會受影響；其實今年四、五、六月都輪住有觸發點，若然九月前特朗普都兌現唔到選舉承諾，又或者只推到無關痛癢嘅政策，就會觸動華爾街大行，到時債息、匯價會行先、回歸大選前水平，美股隨後亦會出現約10%調整，標普指數會見2,200點並唔出奇，港股會見22,500點，不過現時市場對美股嘅期望係唔理性，而且仲有好多憧憬，估計未來市況會好波動。

我建議散戶策略唔好太長線，主因聯儲局仲會加息、歐洲大選等，依家好難長線擺三幾年，有啲好優質嘅股份，都要用區間炒作嘅方法去抵銷外圍嘅不明朗因素，估計板塊會輪流炒，中國政策又唔知會郁邊樣，以指數型產品去高沽低揸會好啲，跌至22,000點買啲、升至25,000點又沽啲。

短線見頂 恒指或失守22000

雷：「基金教父」、著名資深投資者 雷賢達

彩兒：特朗普牛市唔通真係咁短命？

雷：自舊年十一月上旬至今年三月中，美股累積升幅驚人，更加創出歷史高位，現時估值非常高，相信美股會喺高位徘徊，走勢反覆，但一個股市好難連升5個月，除非美國減息、資金突然流入，又或者公司盈利大幅改善啦，所以一旦出現令市場失望或者未如市場預期嘅事就一定會向下調整，因應基金經理睇住個市升上去，舊年年尾冇入市嘅，今年年頭入市都入得七七八八，我睇第二季調整至合理水平嘅機會都好大。

風險與回報不對稱

雷：我睇到全球經濟向好緊，情況冇市場諗得咁差，將來環球央行貨幣政策會不斷轉變，聯儲局話今年會加3次息、美股處於高估值、中國經濟增長又主力建基於信貸及貨幣增長，推升樓價，香港樓價升勢都係全球前列，所以一有差過市場預期嘅消息，就足以對美國以至環球市場有負面影響。

Kitty：美股係咁創新高，港股都跟住上，我身邊班姊妹一心想同佢哋做人世，理智與感情永遠都好似平衡唔到，唉！

雷：現時港股主要受美股同埋北水影響，內地銀根自一五年起就非常之鬆，現時由極鬆轉向保守穩健，近幾個月A股主要係上落市，顧及貨幣政策轉為中性，股市冇大上空間，呢個情況會保持一段時間。

現時港股嘅風險與回報係唔對稱，由舊年年尾約21,500點飆至近期約24,600點高位，短線已見晒頂，如果投資者喺25,000點附近買貨，即係意味住佢睇好恒指會升到27,000點，甚至係28,000點，但我睇唔到今年個市會有咁嘅市況。

事實上，恒指喺過去49年，只有兩年係由頭升到尾、指數冇跌番去前一年嘅水位，嗰兩年分別係七六同埋八五年，同樣係經濟向好、大跌市後市場快速復甦緊，所以用概率估計，今年恒指有機會跌低過22,000點。

依家賺錢嘅投資者唔係靠股市，而係靠期貨同埋衍生工具搵錢，四月個市點走，就要睇吓佢哋想先挾高定掃低先，會係先高後低定先低後高，睇個勢就唔似會推高先，因為若然想推，就要推上25,000點樓上，一旦失敗嘅話，佢哋就會賺少好多喇。

華幣策鬆 利消費股

彩兒：啊，雷生，咁究竟依家有乜心水板塊？你細細聲話我知啦……

雷：今時今日我鍾意消費股，但係好似走勢領先嘅，過去一、兩年被推高咗嘅，好似汽車股咁，買唔買就見仁見智，其他消費股都值得睇好，因應內地貨幣政策好鬆，樓市被炒上，對消息同出口都有幫助，新興市場出口數據近一年唔差，而且中國內需都頂得住！

彩兒、Kitty

若有料報畀彩兒同Kitty或有嘢問，可電郵money.biz@on.cc