Market Insight：樓市加辣低買地產股

DSD、BSD及SSD，依家香港樓市已經有一大堆辣招，加埋金管局逆周期措施，已擁有物業的，在嚴苛首付要求之下，想買第二間都唔易。話說回頭，對擁有多過一個物業的投資者，賣樓換貨意欲固然跌至冰點。

按傳聞，如果差餉加到三倍，大約等於每月租金收入約一成五變咗懲罰稅金，對比起家陣樓價，條數唔算大，未必可以打動業主賣樓退出收租生活。有句說話叫羊毛出在羊身上，加差餉更大可能迫使業主加租將成本轉嫁租客。

樓市升到唔識停，想辦法穩定市場是好事，歸根究柢係要增加供應，土地及公營房屋滿足需求，干涉措施扭曲市場有辣有唔辣，多少會後遺症。辣招下，近年逼買家去晒幫襯一手市場，發展商當然借勢嘜高價，產生高樓價的輻射作用。

同時，古勝之前講過依然睇好本地一線地產股，若然真係落實再次加辣，令地產股短線出現震盪的話，可考慮買番啲，心水仍然係新鴻基地產（00016）同長實地產（01113）。

港股次季暗湧處處

上周期指結算後，首季度季結亦告結束。恒指首季累升9.6%，表現算係咁，可是留意番過去兩星期，港股成交開始愈玩愈縮，證明基金高追意欲不足外，「特朗普經濟學」開始洩氣，第二季港股開局睇怕多少有啲暗湧。

中美關係成焦點

港股業績期過後，本周市場焦點必然中美元首會面，「侵侵」在選舉期間，言之鑿鑿不能容忍職位流失及美國繼續錄得巨大貿易赤字，到底純粹講咗當做咗，擺擺姿態，或真係有意同中國打番場貿易戰，睇嚟本周見到多少端倪。

所謂話都無咁啱，狂人與國家主席會面前夕，美國貿易代表署發表一份全球貿易障礙報告，指控中國政府向鋼鐵業提供經濟資助，引發生產過剩，大量出口擾亂全球市場，睇嚟未到正式會面，已經聞到陣陣火藥味，大家不可不防。

外國巨擘至係贏家

完咗港股季結，上周五恒指低收逼近20日線，大戶首季食得飽飽，大有落雨收柴味道，短期股友不宜太過進取。上周焦點新聞之一，是騰訊（00700）在街外靜靜吸納Tesla（TSLA），合計花掉138億元，成為第五大股東。

消息曝光之後，市場第一反應是兩隻股票齊齊裂口向上，不過路遙知腳力，騰訊高見230.2元之後力弱，縮番落222.8元收市，Tesla周初裂口無補回迹象，上周五高收278.3美元。經過股市投票機器發酵，開始見到市場對交易的真正睇法。

Tesla領袖馬斯克在科技界百足咁多爪，大眾應不會陌生，第一間涉及太空及火箭技術的私人企業SpaceX，以至近日美國加州進行得如火如荼的超高速管道鐵路Hyperloop，在在顯示馬斯克科技視野的遠大，創意無限。

可是身為科技巨擘騰訊，作為中港股市新經濟的代表，不把資源作為自身與科技發展，反而越洋入股成另一美國公司小股東，百多億對騰訊可能只是小交易，但作為騰訊捧場客，係咪要諗吓轉轉軚，一齊去買Tesla而減持佢呢？

古勝