兩星期前我同大家討論過中資來港買地，佢哋唔理自己有無錢，亦唔需要考慮資金係咪響內地搬唔搬到落嚟。反正，佢哋無論係買咩都不過係就地籌旗，係買咗先至諗辦法埋單。
好似海航咁，近來佢哋於資本市場上動作多多，不單只於啟德買咗四幅地，同成為德意志銀行的第三大股東，聽講佢哋手頭上仲傾緊的有一隻於新加坡上市的房託、一間瑞士的機場免稅店，同Aviva於前年四月先買番嚟的英國友誠添！啲人成日話騰訊控股（00700）買呢樣、買嗰樣，八足咁多爪，計我話呀，於海航面前，騰訊算老幾呀？
不過，近日海航終於出招，向市場伸手喇。最新公告指，集團旗下的香港國際建投（00687）宣布1供2，集資93億元，定價仲幾進取個喎，較公告前收市價有0.99%溢價。目前持股達66.64%的海航已承諾會按比例供股，其餘責任就交畀你。你唔要的話呢？建銀國際同海航就會悉數報銷，同你要晒佢！
講開又講，海航系早前投得的四幅地皮，加埋又點只93億元吖？屈指一算，閒閒哋都272億啦！咁其餘180億又點嚟呀？咪又係要各位善長仁翁慷慨解囊囉！目前，海航系股份夾夾埋埋有5隻，除了已經宣布供股的香港建投唔計，仲有海航實業（00521）、航基股份（00357）、嘉耀控股（01626）同埋KTL（00442）。
無獨有偶，這四隻股份昨日統統都跌，唯獨係香港建投有得升！總而言之，持有以上任何股份的粉絲（利申：無我份）就要打醒十二分精神啦！
富昌金融研究部總監 譚朗蔚（作者為註冊持牌人士）