Market Insight：奶粉股炒復甦概念

雅士利業績見咗底

業績見紅，主要原因是為子公司雅士利（01230）作出一筆22.54億元人仔商譽減值，仲有優化奶粉庫存及聯營公司虧損入帳的損失，撇除最大的一筆非現金損失，實際上蒙牛去年賺17億元人仔左右。

去年蒙牛經營數據唔錯，收入及毛利分別有9.7%及14.7%升幅，期內毛利率由31.4%改善至32.8%，可惜雅士利由一五年賺1.18億元變為去年勁蝕3.2億元人仔。

即使唔睇雅士利慘不忍睹的營收表現，單睇三年多前蒙牛以每股3.5元入股，依家得1.51元，點睇都唔係一單理想投資。高管話要撇的都已撇晒，雅士利銷售渠道改造完成後業績應有改善，蒙牛在14至16元牛皮近半年，睇昨日基金補淡倉補得咁狼，炒復甦博佢破16.82元阻力，唔係無可能。

大戶應會酌量減磅

昨日期指結算，恒指高開低走，未到半場個市已經好似被點穴一樣，恒指最終跌90點收報24,301點，再一次失守10日線，論走勢認真麻麻。

大戶會唔會頂埋今日基金季結？好難講，不過睇大形勢，酌量減磅應屬明智之舉。自「侵侵」勝選後，華爾街由恐慌拋售到恐慌追貨，「Trump Rally」輾轉都炒咗四個幾月，一心要推倒奧巴馬醫改政策，最後換得撻Q收場，講就天下無敵，做就無能為力的狂人，執行能力與市場預期顯然有相當大的落差。

「Trump Rally」洩氣都唔係近幾日至出現，二月初道指衝上兩萬一點後，基本上整個三月陰陰濕向下，個個憧憬狂人減稅同大搞基建，推動美國新一輪再通脹。

重新評估加息步伐

可是，十年美債孳息率舊年年底見2.62厘大選後新高，在狂人上任以來已抗絕再升，近日跌返去2.4厘樓下，簡單講，債市開始驚「特朗普經濟學」最終無貨賣，經濟與就業市場不會過熱，通脹溫和，未來美國加息不及好友估計般大。

息口股次季唔太差

美股唔得，港股都好難有運行，況且上周恒指見24,656點創今浪新高後唔肯再上，都係一個警號。睇番港股大時代高位28,588點，落到一六年初低位18,278點，0.618跌幅的重要反彈阻力啱啱就喺24,649點，若然升穿，後市有機會進一步向大時代高位靠攏，不過，無法突破就意味個市仲未擺脫一五年跌浪之後延伸的上落市。

趁基金季結前夕，搵首季港股基金表現嚟參考，估唔到大部分都跑贏恒指同期的10.5%升幅。無疑首季港股較為有路捉，中移（00941）繼續唔得，滙豐控股（00005）回購炒完，反而幾隻芬佬重倉股，好似騰訊（00700）、瑞聲科技（02018）及銀娛（00027）均跑贏指數升幅一大截，不難解釋點解基金成績表首季咁靚。

話說回頭，「Trump Rally」轉入低波，美元、美債息回軟，近排高息債市率先見回勇迹象，第二季開局，息口敏感股例如香港地產股及REITs可以睇番好些少，不妨加入換貨名單之中。

古勝