今時今日唔想被Out，除咗Upgrade自己，睇怕都無乜其他辦法，難怪連老牌貿易股利豐（00494）CEO馮裕鈞（Spencer）都話要再培訓自己。
Spencer呢位被外界視為利豐第四代接班人，尋日帶埋管理層踩足全日分析員日，親自講解整個供應鏈數碼化流程，點樣由40周簡化至21周。
佢講到集團新三年計劃，重點之一係供應鏈全力搞數碼化，預咗要搵幾百位專才幫手咁話。Spencer計好晒數，話希望由現有員工再培訓開始，仲認「其實自己都Train緊」，佢仲即時爆金句話「如果你唔變，世界就會變得更快，你就會Get Disrupted（被衝擊）」。
可惜，現實係殘酷嘅。利豐去年「績弱」差過預期，摩根大通同瑞銀就唔多信呢個三年計劃，仲齊齊調低其目標價分別逾13%及近10%。利豐尋日股價就潛足全日水，急跌9.63%，單日跌幅堪稱近4年來少有，睇見收市價咬緊3.38港元，但亦難逃市值再失守300億元嘅慘況。
余絲韻