絲絲講場：港樓價癲？其實未入流

香港樓價升到嘭嘭聲，但樓價升幅比起其他地方，原來係小巫見大巫。咁去年全球到底係邊度樓價升得最勁？竟然係冰島，升咗14.7%，升幅冠絕全球，而香港就只不過升咗4.2%，升幅排名第32位。

萊坊發表去年第四季《全球樓價指數》報告，指數統計全球55個市場嘅一般住宅，指數去年升咗6%，較二○一五年嘅4.1%為高。

睇番統計範圍內嘅地方，去年樓價升得最甘係冰島，按年勁升14.7%，比起第二位嘅新西蘭錄得約12.7%升幅，明顯多出2個百分點，而冰島亦係首次於該指數升幅榜排行第一位。

香港又點？報告話香港去年樓價只係升咗約4.2%，只係排第32位，升幅仲差過大市。內地樓價去年升勢強香港一大截，升約10.8%，全球排名第七。新加坡就跌2.6%，排第53位；台灣仲跌得多啲，跌6.5%，排第54位。

但絲絲睇番差餉物業估價署資料，香港私人住宅樓價指數去年升幅有成7.8%，高過上述指數喎，可能兩個指數取用嘅成交資料唔同啩。不過點都好，講到樓價，就同氣溫一樣，數字與實際感覺係兩回事！

余絲韻