絲絲講場：Apple庫克面試：有你講冇佢講

見工時，面試官不停問你問題，咁好正常。但若佢係全程唔出聲坐喺度齋聽你講？咁肯定令你有無形壓力，蘋果CEO庫克就絕對係後者。

嚇到不停自爆

蘋果前管理人員Kim Scott最近出咗本新書，當中回憶起當年面試。「我去蘋果見工嗰時，有人早提醒我，庫克個人非常沉默，千祈唔好畀佢嚇到。」

庫克果然全程係個好安靜嘅聆聽者，開聲一問，就問Scott之前喺Google做時犯錯最大嗰鑊係咩！「雖然有人提醒過我，但嗰陣我冇放喺心度，所以我就開始同庫克坦白」，Scott見庫克唔出聲一味聽，就愈爆愈多，連唔應該講嘅都講埋出來，咁樣坦白落去，分分鐘冇咗份工……

地震救番份工

就呢個時候，突然地震，成幢大樓喺度搖！Scott好彩「震」番醒，聽到警鐘響佢即覺有救，趁機反問庫克幢大樓點解搖得咁奇怪。庫克當然忍唔住向Scott解釋佢哋總部用咗啲咩先進抗震設計乜乜乜……結果？Scott成功入到Apple做囉。

查實庫克呢招安靜聆聽，到底係想畀應徵者暢所欲言定想嚇人呢可？

余絲韻