Market Insight:汽車股撈貨咪心急

上周大市連續兩日以大成交向上,後市大有山雨欲來之象。但論到場面壯觀,不得不提汽車相關股逃亡潮,藍籌新貴吉利汽車(00175)、新晨動力(01148)、廣汽集團(02238),統統插低10%,長城汽車(02333)、正通汽車(01728)分別跌8.8%及6.6%。

早排個市仲熱炒中汽協建議重推汽車下鄉的建議,上周五趁富時指數變動,長汽喺業績公布前夕減價促銷幾款SUV,直頭夾都無咁啱,咁就做咗啲車股落去。

查實近年汽車、濠賭及新能源等對沖基金熱炒板塊,基金與一眾大行研究部都會跟到好貼。好似汽車股,直頭會搵人隔一兩日與車廠及分銷商聯絡,keep住有最新銷售數據,所以話上周五一類的崩圍,偶發性的機會微乎其微。

再睇幾隻汽車股急跌前的沽空表現,明顯長汽及廣汽都有異動,沽空佔成交比重由三月上旬一連多日高企之後就出事,似是有心做淡的大孖沙所為。

上周五成交之大,如果有心補空倉食胡,照計乜都夠補,問題係踩完一腳咁深之後,基金經理未必會即時轉軚,睇怕要靜一排。上周五趕及逃生,想再上車不妨等等,走唔切就惟有坐定定得下一次機會。

炒家揀股以旺為先

富時中國指數成分股變動生效,上周五埋單計港股錄得逾1,200億元主板成交。一隻盈富基金(02800)成交額94億元,睇嚟唔少追蹤或者以富時指數基金作為投資基準的基金,仲未完成調動,焗住借盈富先做套戥。

美圖升勢欲罷不能

搞到股民嘈喧巴閉,仲有隻炒到出煙的美圖公司(01357),由開市價15元一路級級上,掃到尾市最後一口價本來只係17.3元,點知尾市U盤時段,某美資行擺出唔買無得買姿態,五球幾買盤一嘜而上,最後收報18元,單日升足兩成。看官若非善忘,早幾日古勝介紹時只係10元鬆啲,眨眼起個孖,強到無朋友。

最弔詭嘅係,睇番「手遊三寶」──雲遊控股(00484)、IGG(00799)及博雅互動(00434)完全無動靜,可見今日內地莊家及本地炒家,與其亂石投林,情願將籌碼推晒落個市鑊氣最旺嗰隻。依家通街唱短期見20元,不過由周五尾市墟冚場面,18元U落去嗰個想見幾多,在下都好想知。

地產股大折讓抵博

上周新加坡撤銷實施近六年的樓市辣招,調低賣家印花稅,對應近四年,新加坡樓價由高峰回落逾一成 。香港睇怕都幾難跟住減辣,中資來港搶地愈買愈瘋,海航系五個月內四奪啟德地皮,以平均地價每呎萬三元樓上,真係想像唔到,三、四年後區內新盤要賣到咩價先有錢賺。

政府調控 樓市失控

最慘係想上車的小市民,排公屋條隊愈來愈長,最慘本來有能力上車的,聽信財金官員長期靠嚇,講到美國加息後香港樓市必受拖累,結果聯儲局加下一次,加下又一次,到累加三次的今天,香港樓價還是繼續破頂。近排有老友問古勝,依家入市好唔好?呢個問題橫睇豎睇都無upside,買咗樓價再升好哋哋,萬一摸頂隨時老友都無埋。

話時話,地價愈高,地產股股價較資產折讓就愈大,美國下次加息好可能在六月發生,短期買番啲地產股,風險唔大之餘,或者有意外收穫。

古勝