孖妹Ｓ檔案：炒指數新玩意贏盡Chok爆市

投資者最棹忌乜？以孖妹打牙骹打遍港九新界魚缸嘅非正式調查顯示，悶到瞓着嘅市況係排首位，反而發發聲嘅市況先令股友們如癡如醉，皆因可以大顯身手吖嘛！查實耶倫BB三月講到明要加息，歐洲國家又排住隊大選，英國又要找數搞脫歐，真係樣樣大事都關港股事，想好淡通殺其實一啲都唔難，傳統啲可以揀期指期權、輪證產品；新潮啲就可以揀新鮮滾熱辣、聽日上市嘅恒指槓桿及反向產品，一於就搵專家抽絲剝繭，上番堂速成班！

炒指數新玩意贏盡Chok爆市

券商教點玩：睇升揀槓桿估跌用反向

陳：華夏基金（香港）業務拓展部總監陳志豪（Vincent）

蕭：三星資產運用（香港）交易所買賣基金市場推廣副董事蕭曉婷（Joanne）

Kitty：等到人頸都長埋嘅恒指同國指槓桿（2倍）同埋反向（-1倍）產品，聽聞聽日有4間發行商齊齊推，一次過有16隻產品出街，但係我有好多閨密都嘈嘈閉話唔識玩，不如拍硬檔幫手解釋吓啦！

蕭：槓桿及反向產品其實係ETF（交易所買賣基金）結構，投資目標係以每日為基準，即係未計及費用同開支前，槓桿產品同反向產品分別係希望緊貼相關指數單日表現2倍，同負1倍嘅單日回報，最大潛在損失係投入咗嘅整筆本金，產品會收管理費。

即係睇好後市可以揀槓桿產品，目前最高槓桿倍數係2倍，而睇淡後市就可以揀反向產品，最高槓桿為負1倍。作為呢類槓桿及反向產品嘅管理人，基金經理會每交易日視乎投資組合嘅情況進行Daily Rebalancing，即係每日重新調整嘅工作，去保持槓桿及反向產品能追蹤相關指數每日表現2倍或負1倍嘅單日投資表現。簡單啲講，以睇好嘅槓桿產品為例，如果相關指數上升，基金經理就會加大投資組合持倉，而指數下跌就會減少持倉，去維持番槓桿2倍倍數。

彩兒：其實我哋用輪證、期指都做到同樣效果，我哋唔會盲目追新款喎。

陳：槓桿或反向產品結構好簡單，入面得兩樣嘢，就係現金同指數期貨，等於幫投資者買或者沽期指，同時幫手控制槓桿水平，如果投資者自己買期指，就需要面對畀人Call孖展、斬倉等問題，但買入相關產品，因為基金被斬倉或補倉而受影響嘅機會極低；亦唔需要面對輪證嘅槓桿倍數較高，並涉及到期日、引伸波幅、行使價、收回價、時間值損耗等問題。

陳：槓桿及反向產品好處係定價透明度高（莊家開價會參考即日估計資產淨值－－iNAV，發行商會每日公布iNAV數據）、入場門檻低（幾百蚊一手起步）、結構比較簡單，投資者如果對衍生產品有少少認識都適合投資。至於缺點，因為佢涉及衍生工具，所以會有風險，另一方面又唔適合作為長線投資，因為佢係追蹤相關指數單日表現，同埋只適合單邊市況，若然產品係冇莊家運作嘅話，產品有機會停止交易，建議投資者搵多莊家或者參與證券商，會穩陣啲、買賣差價亦會窄啲。

三星資產蕭曉婷稱，槓桿及反向產品其實是ETF結構。（黃仲民攝）

華夏基金陳志豪稱，槓桿及反向ETF多年前已在美國出現，且花款眾多。

單邊市料利好回報

Kitty：槓桿或反向產品唔啱談戀愛，咁同佢一齊，又應該用乜策略？

陳：槓桿及反向產品喺單邊市係有利，例如大市連升10日、8日或者一個月入面有八成時間係升嘅話，計及買入槓桿產品嘅回報可能會高過2倍；但若然係睇錯邊，因為有Daily Rebalancing機制，一路跌一路減持倉，就唔會蝕多過2倍。喺咩時間適合投資槓桿及反向產品？就好似舊年英國脫歐事件，當時美股一周跌約6%，當時若然係買入反向產品，都可賺到約6%。另外，特別係跌市情況之下，如果係揸住股票唔想沽，就可以用反向產品對沖持股嘅虧損，若然倉位大，仲有機會有盈利出現。

留意開價市場深度

Kitty：其實我哋班股友買開嘅ETF來來去去都係嗰幾隻，其他嘅成交長期都少到喊，會唔會中伏呀？

蕭：因為槓桿及反向產品係每日為基準來追蹤指數表現，係複式效應下，若果市況呈單邊市會對產品回報有利啲。槓桿及反向產品嘅成交金額唔高，但綜觀本港ETF市場嘅成交主要集中喺港股同A股相關ETF，更重要嘅係投資者買賣槓桿及反向產品前，要留意相關流通量提供者嘅開價情況同市場深度，可能呢方面比成交金額更重要。

陳：槓桿及反向ETF早在二○○六年喺美國出現，現時分別最高有3倍同負3倍槓桿，當中花款多多，除咗追蹤股市嘅正路產品之外，基本上你諗得出嘅投資Idea都有得玩，例如追蹤金礦股、金屬、農產品、貨幣、債券及波動指數等。

炒期指進階：「創新高就平倉反手沽」

潘：駿溢環球金融董事總經理潘國華

彩兒：我最期待嘅畫面終於出現，全市場都覺得美國今個星期加硬息！

潘：其實都應該走唔甩啦！依家最緊要係吼實未平倉合約（Open Interest）嘅情況，如果個個都加倉，自然會挾上，若然最終係冇加息，都係會挾住升，所以短線不妨做期指好倉……但係內地唔係咁好景，我同內地人傾，佢哋就話內地經濟唔係大家想像中咁好，而且特朗普對華態度未明朗等，睇長少少，我覺得再挾升機會唔大，所以可以愈創新高就愈去沽，恒指一創新高就平倉反手沽。