Market Insight：玻璃股炒作概念多

洛玻近年進行重組，相關動作多多。今年二月初宣布向母企及中國建材工程等關連人士收購光伏玻璃業務，之後就公布計劃投資新能源材料。平板玻璃行業面對產能過剩問題，而據了解，這並不包括光伏玻璃，光伏玻璃供需關係較為平衡。

至於新能源材料項目，集團於聲明中指，項目生產的超白光熱材料係太陽能光熱發電的重要基礎材料，睇嚟集團有意喺新能源材料市場上分一杯羹。

福萊特作勢突破

講起光伏玻璃，仲諗起信義玻璃（00868）及福萊特玻璃（06865）。後者上周五亦以大陽燭上升，最後升5.8%報1.8元。福萊特舊年上半年純利按年增長七成，兼派息5.5分人仔，刺激股價由1.6元水平升至2.19元，而近五個多月喺1.6至1.84元之間上落，若有成交配合，突破橫行阻力，有望挑戰2元，否則應繼續維持區間上落格局。

匯債市已現反高潮

美國上周公布之二月份就業數據，非農職位增長勝預期，失業率落到4.7%，低於5%的公認全民就業水平，「侵侵」的經濟政策仲停留口噏噏階段，美國就業市場已開始見過熱迹象。

美國就業市場開始步向緊張，從平均時薪升幅比預期大，可見老闆們開始要透過加人工留人或搶人。美國CPI升幅企住喺四年高位，恐怕有進一步飆升風險。周中聯儲局加息，可以話幾成梗局，問題是今年加兩至三次夠皮未？

幾個月前，個個人話「侵侵」勝選勢必引發環球股災，幾個月後，災就係災，只不過係無貨者大災難！基金大戶齊齊轉軚恐慌性追貨，大家一廂情願樂觀，榮景仲可以延續幾耐？只能等歷史話畀我哋知。

古勝上周留意市場初見異樣，華爾街股市繼續為強勁數據狂歡，但美債及美元匯價已經見反高潮，美匯指數炒番轉頭，收101.1水平。兩周內兩次去到102樓上行人止步，更無能力返到舊年底今年初「侵侵」勝選蜜月期間創出的新高。會唔會係聯儲局加息，預期炒完，準備Sell on fact等兌現一刻掉轉頭，棄股吸債的先兆？宜密切留意事態發展。

汽車相關股繼續尋寶

今浪港股去到24,216點行番轉頭，成交返回六、七字頭悶局，上周五恒指反彈67點，令全周錄得15點進帳，終止連跌兩星期的弱勢。留意到上周五超過800隻股份見紅，遠多於上升股份，基金見兩萬四樓上頂得實，入市趨向更審慎及集中有古仔配合的股份。

汽車股可算是最誇張的板塊，藍籌新貴吉利汽車（00175）上周初股價仲係10.64元，周三、周五抽咗兩浸勁，見過12.04元高位，收報11.92元，一周累升11.4%，對一隻市值逾千億的股份都唔講得笑。

唔少人原先睇淡，以為今年內地低排量汽車稅務寬減折半，汽車銷售會水瓜打狗，結果不單止睇錯，仲錯得好緊要，一、二月吉汽銷售按年分別勁升71%及1.67倍。

4S股有追落後條件

查實今年中央嚴控樓市，為免經濟縮得太快，必然有一些谷高內需的政策頂住。近排內地唱到行晒欲重推汽車下鄉政策，令車股火上加油。如果乜貨都未有喺手，考慮估值，零部件及4S股都有追落後條件，在下心水股有正通汽車（01728）、大昌行（01828）及新晨動力（01148），大家不妨在板塊中搵搵仲有冇漏網之魚。

古勝