政府尋日公布委任畢馬威中國前主席兼行政總裁姚建華出任港交所（00388）董事，接替已屆6年任期嘅夏理遜。今次委任令一眾華資小經紀徹底失望，因為董事局將再冇華資經紀代表，仲畀外間揶揄董事局係咪有「世襲制」！
事關姚建華出身自畢馬威，佢接替嘅夏理遜又係畢馬威中國及香港前主席。最巧合係夏理遜喺一一年獲委任加入港交所，又係接替已故畢馬威前主席兼行政總裁張建東，難怪尋日政府一公布委任，市場就質疑港交所董事局係咪有「世襲制」？
有市場人士話，唔係針對姚建華，佢為人唔錯，經驗又豐富，但就非常好奇其他「三大」會計師行點睇今次任命。事關「三大」都有大把叻人，委任港交所董事方面係咪應該「轉換」吓？