絲絲講場：滙豐至架細「分行」 一姐撐場
為咗間可能係全香港最細Size嘅銀行「分行」，要驚動滙豐大中華一姐黃碧娟（Helen）？換個角度，嗰個亦可能係全香港最完善嘅理財中心！
下月再添流動銀行車
滙豐個日夜理財中心（Day & Night Plus）尋日開幕，中心位於沙田水泉澳邨廣場，為較偏遠地區居民提供銀行服務。成個中心一眼睇晒，可堪稱全港Size最細嘅銀行「分行」。但麻雀雖小，五臟俱全，中心除有幾部24小時運作嘅自動櫃員機（ATM）外，日間會有兩個銀行真人櫃枱提供服務，仲唔係最完善嘅理財中心！
為咗方便其他偏遠地區市民，滙豐喺四月會再推出一架流動銀行車，加埋年底架新車，滙豐未來一共會有三架流動銀行車為大家服務。
話時話，Helen尋日去最細Size「分行」時，成班員工列隊用掌聲歡迎Helen到場，咁嘅場面，絲絲真係好少見！
余絲韻