絲絲講場：驗樓奇談恐怖到唔信
每年入伙新盤愈來愈多，驗樓就愈來愈奇幻。前年就有牆角生出「靈芝」、天花板出現鐘乳石，十足十愛麗絲夢遊仙境；舊年有新嘢出現，包括有「殭屍露台」，兼驗樓驗到有「屍骨」……刺激到可以同班Friend諗定喺度開P慶祝萬聖節咁興奮（嗱，若果層樓唔係自己嘅話）。
話說驗樓師詹濟南分享舊年驗樓奇聞。詹Sir話，舊年大大話話有成40幾個新盤入伙，平均每月都3、4個，有時驗樓見到嘅騎呢嘢，講你都唔信。
村屋盤驚現「化骨龍」
最驚嚇就係收樓收埋成條「化骨龍」，佢舊年一個新界村屋新盤驗樓時，就發現一條兩吋半長壁虎骸骨，其實驗樓咁耐，連蛇都見過，但成副骨就真係第一次。
除此之外，喺荃灣一個二手樓驗樓時，就發現冷氣機頂上有個直徑約200毫米雀巢；亦有新盤未入伙，木門框已有蟲蛀，唔睇清楚仲以為係釘窿。
雖然近年唔少新盤質素都有提升，好似舊年獲得最高評分新屋苑，評分達到93分，屬歷來最高。但部分新盤仍有不足，包括建築廢料塞廁所、地板彈起，洗碗盆甩水龍頭、外牆未完成、穿屎渠及地台穿大窿等。詹Sir笑住溫馨提示，如果穿屎渠，沖廁時要小心。
至於單位內設計，詹Sir話有港島單幢樓有「殭屍露台」，只夠你成碌杉直筆甩咁企喺度，伸唔直手之餘，相信連大肚婆都企唔落。
其實驗樓咁多年，詹Sir都得罪過人，佢話上年試過有人打電話「找晦氣」，但仍會堅持驗樓準則。
余絲韻