絲絲講場：內地企業註冊商標 爭用第一千金個名
美國總統特朗普第一千金伊萬卡（Ivanka），自從農曆新年時與中國大使會面後，開始喺內地人氣急升，中國人即刻喺內地搶註Ivanka商標。
至少有65家內地企業向中國國家商標局申請用Ivanka嘅英文名做商標，啲產品由化妝品、補品、酒類、牆紙，連衞生巾都有，當中有一家北京瘦身公司更一口氣提交咗十份申請添。
除Ivanka英文名外，依家已有約40家內地企業用咗第一千金中文譯名「伊萬卡」做註冊商標，大部分係化妝品、服裝同內衣。
其實，第一千金個阿爸特朗普早喺○六年時，就曾因為有內地人早過佢喺內地用「Trump」做商標，搞到特朗普自己申請註冊唔到，直到佢勝出美國大選後先至上訴成功。今趟唔知阿女又點打算呢？
余絲韻