絲絲講場：鴻福堂美食車功能改變
鴻福堂（01446）係美食車先導計劃其中一員，可惜首輪未抽到靚位，首站登陸人流唔多兼大風嘅中環海濱。鴻福堂執董司徒永富（Ricky）話旨在推廣同強化品牌，美食車周圍走又可化身流動廣告，兼喺不同地點為新食品「把脈」，一舉兩得咁話。
分店續約加租雙位數
佢哋業務發展署經理孫文龍（Joe）其實亦早計好晒數，話美食車及設備等成本約100萬港紙，兩年回本應該冇問題。公司今年預計開多6至8間分店，佢哋舊年已搞埋網購平台，實行O2O協同效應，藉此彌補分店店面有限、只推季節性產品嘅問題喎。
零售店舖租家陣仲係咁癲，絲絲聽Ricky講，佢哋今年三分一已續租嘅分店租金，平均增幅係雙位數o架！
余絲韻