絲絲講場：帽后收玫瑰園冧爆
尋日係情人節，「帽后」飛達帽業（01100）顏寶鈴（顏太）一向同老公顏禧強（顏生）恩愛甜蜜，睇怕顏生送花送禮物唔少得喇！
點知顏太就話，福建男人嫌花好貴唔興送花喎，但係顏太又好鍾意玫瑰花，投訴咗幾次之後，最尾顏生竟然喺3、4年前買咗個農莊嚟補數！
「女人好簡單最易氹」
顏太仲話，個玫瑰農莊係顏生同妹夫夾份買嚟送畀顏太同佢個妹，裏面種咗好多唔同品種嘅玫瑰花，顏太連續講咗幾次「好靚好靚」，個樣冧到呢！講到幾錢？顏太就即刻話講心唔講金，仲話女人其實好簡單，只要喺適當時候講吓說話氹吓就得喎。
至於顏太「第二春」嘅孟加拉廠房，佢話第二期開始動工，樓面面積有35萬呎，到一九年目標產能會倍升到每個月500萬件咁話。
孟加拉拓展「飛達鎮」
講開作為孟加拉開荒牛嘅顏太，由於帶動到工廠所處嗰個鎮發展得好好，所以當地市政府將個鎮改名為「飛達鎮Mainland City」，佢話有個「123」目標，即係目標喺個鎮度有1間工廠、2間學校、3萬個村民，好威水呀！
余絲韻