絲絲講場：朱泰和撐學生過老闆癮
唔少企業同金融機構都會支持學生活動，喺畀中學生一嘗做老闆滋味嘅「趁墟做老闆」活動，就見到友邦保險（01299）前高層同渣打香港一姐嚟撐場。
好耐冇見傳媒嘅友邦保險前集團首席投資總監朱泰和尋日現身撐場，一向都好疼錫學生嘅朱生相當投入，睇學生表演跳繩嗰陣更加拍爛手掌，而學生偶有失手嘅時候都忍唔住戥佢哋覺得可惜，今次友邦有份幫手嘅中學攞到獎，睇吓朱生笑得幾開心。
下個月就退休嘅渣打香港區行政總裁陳秀梅（May）亦有到場，佢話年輕人有創意好緊要，寄語學生唔好怕失敗，最重要學識解決問題同保持樂觀。
余絲韻