Market Insight：手遊股展開新升浪

「侵侵」近排驚死人話佢走數一樣，閃電兌現選舉承諾，神經刀作風亦開始嚇親華爾街樂觀派，道指又再縮返落兩萬點樓下，回到泥漿摔角的上落市。

憂中美貿戰一觸即發

港股周三尾市跌幅大為收窄，本就預示美股在議息後會發力再升過，最終事與願違，大市昨日打回原形，跌133點收報23,184點，主板成交縮到492億元。蘋果概念股及資源股比較強勢，股仔炒作失焦，魚缸友個個想等埋今日A股復市先至算。

美國大選至今，港股經歷V形反彈，整體表現原地踏步，近排氣氛好番些少，咁啱又遇上「侵侵」連美墨建牆，甚至禁止七個穆斯林國家市民入境咁荒誕的指令都做得出，甚至乎出埋真人秀金句：「You're fired」，對署理司法部長手起刀落，咁形勢都咪話唔驚。

若非善忘，狂人競選期間最敵視中國，指其操控人民幣匯價，中國貨搶去美國工人飯碗，依家入市，最驚第二朝瞓醒美國已經單方面向中國開打貿易戰，咁就大大鑊。

中煤隨時借挾淡炒上

今日A股復市，從假期前盤路推測，三月舉行的兩會概念應該未有耐炒完。由密集的地方兩會議題可見，今年主題還是圍繞住供給側改革，全面的去清過剩產能，環保政策及推動潔淨能源等。

近排國際動力煤價返回三年半高位，內地煤價在主要煤商減產下，經歷超過兩年反彈，去年第四季企住高位唔肯落。無疑，煤炭生產商業績的最壞日子已成為過去，問題是，兩會前夕揀邊隻爆發力比較好。

古勝橫睇豎睇，決定揀隻中煤能源（01898），一來首三季業績可見，全年由虧轉盈已無懸念；其次是年初至今，沽空佔成交金額長期維持雙位數字（僅昨日例外），挾起淡上嚟應該最有睇頭，見其股價啱啱破咗短期旗形頂4.17元，可以跟番轉。

內地遊戲產業高增長

雖然舊經濟股炒風持續，惟「業績為王」仍適用，睇睇蘋果公司同facebook就知。喺香港上市的手遊股亦做好，IGG（00799）同博雅互動（00434）已連升兩日。

去年全球移動遊戲產業白皮書報告顯示，中國去年遊戲產業收入逾100億美元，按年增長41%，可見內地市場商機龐大。IGG及博雅的業務表現唔差，IGG舊年上半年收入按年增兩成，純利增5%；博雅首三季收入跌14%，純利卻增四成。近一年多來IGG不斷回購股份，亦對股價有一定支持。

另留意到百富環球（00327）及B2B電商平台慧聰網（02280），亦分別連升六日及七日，牛皮市都有咁表現，不妨望多兩眼。百富近年積極拓展海外市場，去年首三季海外市場收入超越內地市場，並錄得15%增長。

慧聰網早前發盈喜，料一六年純利大增兩倍以上，帶動股價炒上。該股昨以全日高位6.72元報收，創近一年半新高，守6元樓上後市仍有運行，惟要留意14日RSI已升至90，短線或有回吐。

古勝