絲絲講場：貿易場催財 百金條贈興

92歲出市員續戰股壇

港交所嘅亮點就係行政總裁李小加握手祝賀超過92歲嘅出市員龍炳唐，呢位龍伯伯喺交易廣場服務長達31年，真係寶刀未老！

尋日金市首個交易日，金銀業貿易場除咗例牌公開喊價外，仲請咗財神爺坐鎮，咦？乜又係你啊蘇生？講緊嘅之唔係第一金行政總裁蘇裕斌囉，佢已經係第三年以財神身份嚟賀金市開市。問佢扮咗幾多次財神，蘇生話除咗金銀業貿易場，仲會去馬會同第一金，次數多到數唔晒。

金銀業貿易場尋日豪晒逾100條金條。

港交所今年又請小鼓手擊鼓造勢。

蘇生有福氣嘅身形，做御用財神當之無愧！財神大派利是同糖果，特別嘅利是封有齊財神同金條，寓意大家將財運帶返屋企，今年仲唔賺到笑？

港交所就邀請咗好多嘉賓到場慶賀，除咗主禮嘉賓財經事務及庫務局局長陳家強之外，仲有一班證券界人士，包括國泰君安（01788）主席兼行政總裁閻峰、港交所董事李君豪、上市公司商會主席梁伯韜、香港股票分析師協會主席鄧聲興等等，認真人才濟濟！

該所今年繼續搵嚟英華小學中國鼓隊「鼓樂英騰」金鼓齊鳴，一班小鼓手每一下擊鼓都充滿力量，期間仲加插「拋棍」動作，節奏感強勁之餘亦好有氣勢添！

余絲韻