雞年首個交易日，敬祝各位股運亨通！新春期間，特朗普發出移民禁令，引發歐美股市震盪。正所謂「新官上任三把火」，狂人總統上任不足月即炒咗前朝臣子─署理司法部長，一言不合就即手起刀落，真係唔係人咁品！唔知幾時會輪到聯儲局主席耶倫呢！
過年前港股唔聲唔聲經已升咗上23,000點樓上，由於外圍市況波動，呢兩日有機會買到貨，再等周五A股紅盤高開上試23,500至23,600點阻力區收割。大價股騰訊控股（00700）依然係大小戶至愛，長短棍佳選。
由於狂人總統開始要破舊立新，美股高位必有動盪，歐股亦難有安寧，集中火力主攻以內地市場為主的內需股方為上算。押注國企改革概念，可以睇吓隻中國糧油控股（00606），長假前抽上來唔肯回，短線守穩3.5元樓上，應該有力上衝4元大關。
早前中糧控股發盈喜，料去年純利達14億元，表現遠勝市場預期，主要受惠於上半年對沖損失逆轉、壓榨與生物燃料業務邊際利潤擴張，以及開工率提升，更料盈利增長周期持續，基本因素有所改善。
行業消息方面，早前全國糧食流通工作會議強調要深化國有糧食企業改革，建立健全現代企業制度，積極穩妥有序發展混合所有制糧食經濟，組建跨區域、跨所有制糧食企業集團，開展全產業鏈經營。中糧係不折不扣的國企改革概念股，炒呢個概念，應該唔會少咗佢嗰份，加上業績改善，受惠重估浪，希望年內目標可坐四望五。
司慕渢