對沖國度:做淡向來遠比做好難

香港投資者實在太過審慎,升少少就無意欲去追,反而想抓住機會鎖定利潤,所以走勢一路都是反反覆覆矮仔上樓梯。唯一有動力的機會,是忽然之間殺到淡友措手不及。今明兩日收爐感覺更濃烈,成交低是突襲的好機會,自己一定會加緊戒備去博,希望終於可以爆上23,200點之上。

阿里巴巴股價重上100美元之上,上星期睇過一篇外國投資者所寫睇淡阿里巴巴的文章,主要理據都是攻擊公司管治方面的問題,一睇就知道可以不理,因為所有論述都並非新事物。買得阿里巴巴的投資者,不會不知要小心提防,個個都是偏向虎山行,單單指出山上有老虎危險,是不足以勸退硬頸的冒險家。

嚇人需要新角度

所以做淡的理據最緊要新鮮,要有新的不利因素才會有威力。港股也是一個好例子,本地年輕人鐘意講「支爆」,但支爆不但遲遲未見,炒爆就有,中國的原材料股及上游工業股就紛紛升到爆機,和淡友事與願違,就是因為欠缺新的角度去嚇人。

係人都知的不利條件,並非完全無威力,但很可能先要股價走得更高,又或者是需要進一步發酵,例如阿里巴巴高價時做了一單不被睇好的收購,股價才會插水。

做淡其實遠比做好難,近期外圍市場情緒向好,只是香港人特別驚青感受不深。在這種環境之中,集中在好倉發展會比較上算,無謂在太平盛世中太過敏感。

豐盛金融資產管理董事 黃國英(作者為註冊持牌人士,基金持有阿里巴巴)