絲絲講場:保險公司勸客捐保單

好多人都會買人壽保險,有冇諗過他日走咗後,壽險保單賠款點處理?除咗留低畀子子孫孫外,其實仲有個方法可以造福更多人,就係捐贈出去。

香港人壽保險從業員協會慈善基金搞咗個「千人傳愛 共捐保單」行動,仲邀請大批宏利保險嘅代理同客戶,齊齊簽署保單捐贈文件。今次最少可捐贈1%,最多就梗係多多都唔拘啦!

三年料有10億捐款

唔講唔知,原來呢個活動已經舉辦咗十一年,至今收集到嘅捐款大概有2億元。香港人壽保險從業員協會慈善基金仲話,希望未來三年可推動高達10億元嘅捐款,僅次於馬會咁話。

余絲韻