絲絲講場：永隆落區教用電子銀行
銀行過年前派福袋，仲落埋區開工作坊教大家用銀行電子服務！有份咁開開心心嘅係天水圍居民。
永隆銀行上周四同香港基督教女青年會合作，喺天水圍綜合社會服務處舉辦「財」「智」通識工作坊。銀行義工先用銀行冷知識，同幾十個居住於天水圍區基層人士打開話題，繼而為佢哋介紹電子銀行服務，好似自動櫃員機、視頻銀行、手機銀行同網上銀行嘅用法、注意事項等，希望協助天水圍居民用自動化電子銀行服務，減低對實體銀行分行嘅依賴。
另一樣吸引嘅，當然係銀行為參加者準備嘅福袋，福袋入面有米、醬油、餅乾同零食等，實實際際過肥年！
余絲韻