孖妹Ｓ檔案：洗走劣股接財神

就到年廿八，又要洗邋遢，個個忙住將個廚房「省到立立令」、清衣櫃、抹乾淨門窗接財神等等。查實孖妹都做到踢晒腳，除咗執衣櫃啲靚衫令我哋頭痛之外，仲有個投資倉未執好，認真搞到頭都大埋，與此同時，發現原來有好多財金專家同股友都為執投資倉密密起革命，趁機的起心肝仔去舊迎新，務求新年可以全力出擊賺番幾桶金。

洗走劣股接財神

芬佬及分析界代表：黑天鵝年內成常態

尹：傲揚集團投資總監尹滿華

彩兒：你張辦公枱空蕩蕩咁，實係因為我哋嚟探你而提早大掃除喇！

尹：我自己有習慣喺年尾就會執書架，清走唔要嘅文件同報告，過年前騰出空間。大掃除時睇番過去一年金融市場嘅嘢就覺得好有趣，因為真係黑天鵝滿天飛，回看事件結果，就會覺得市場上好多預測都好兒戲，個世界變咗，今年黑天鵝可能就會變成常態，想預測大市去向變得愈來愈難。嚟緊需要注意歐洲會唔會變天，若德國總理默克爾保唔住個位，由脫歐派上場，歐盟可能分分鐘散，咁都算喇，但如果冇咗歐元就真係大件事！

尹滿華去舊迎新組合
傲揚尹滿華稱，未來需要注意歐洲會否變天。

航空內房面臨困境

尹：記得睇實美國總統特朗普上任後100日嘅大計、英國係咪會硬脫歐，法、德、荷等國領導人換屆會否令歐盟有解體危機。短線睇，要留意特朗普上場後係咪會一如承諾去推行政綱，會推得郁定係一廂情願，佢一句口術都已經可以牽動市場，所以過年後市場都會好波動，但每次調整都會係買入嘅好時機。

Kitty：有閨蜜拜託我請教你啊，今年最應該掃走（沽出）啲乜衰貨？

尹：最唔應該再留戀嘅係航空股同內房股。我認為呢年，油價會續升，通脹會抬頭，令利率上升，仲有航空公司面對工會壓力，不斷捲入勞資談判，航空交通競爭又不斷升溫，所以要Out咗航空股。內房一六年曾有唔錯升幅，但一六年底起，中央再調控，顧及內地樓價唔係升咗一、兩成咁簡單，有地方升幅以倍計，升勢根本唔健康，勁升情況唔會永遠持續，料內房商銷售會下滑。

中銀穩健大媽寵愛

彩兒：我份人好實際，想知應該迎接邊啲「財神股」多啲！

尹：一六年，大宗商品升得好勁，資源股好值得關注，雖然江西銅業股份（00358）、中國鋁業（02600）累升唔少，但相對商品價格升幅仲係落後，股價與高位相距仲好遠。喺全球經濟復甦、走向增長題材下，仲有特朗普要搞基建；供應方面，因內地有供給側改革，去產能、去產量，帶動銅、鋁等資源價格上升，上述兩股都唔可以忽視，潛在升幅較大，但因大宗商品走勢大起大落，資源股受影響下會較Chok，較適合高風險承受能力人士。

尹：以往內地散戶好搏命，力求每年有兩、三成，甚至係翻一番嘅回報，但經過大時代後嘅洗禮，依家保守咗，長線有4至5厘已心足，呢啲選擇喺內地唔多，再加上人民幣貶值推波助瀾，港股通成為出路，令呢啲內地資金好關注香港藍籌股，以中銀香港（02388）為例，股息率有約4厘，喺人仔國際化之下可優先受惠，而且作風穩健，因此畀內地險資睇到實。

魚缸經理代表：地產股危避之則吉

石：北京首通證券香港市場行銷副總裁石泳傑

Kitty：你就好啦，搬新屋冇耐，啲傢俬新束束，乜都唔使抹，可以專心炒股！

石：都係呀，但係有啲嘢真係唔掟唔得囉，嗱！好似香港地產股就必掟，皆因第一，美國落實加息；第二，香港樓市升咗咁多年，都未見過大調整，政府愈出招佢就愈升，單位就愈起愈細，啲人（潛在買家）已經唔想買，想睇定啲先，部分新盤啲呎價都已經離譜到令人卻步，所以我睇淡香港地產股。

彩兒：我知你鍾意做空軍，做淡當食生菜，呢排有乜好路數？

石：我平時鍾意利用股票期貨做好倉或淡倉，但呢樣嘢喺散戶世界真係勁冷門，主要都係同莊家買賣，近期我做淡新鴻基地產（00016），依家沽咗幾張合約，計劃沽夠10張，約8,000蚊一張合約，槓桿有十零倍，平均入市價係104.5元，打算揸3個月，揸到美國再加息先平倉。

騰訊夠大路無得輸

Kitty：嘩，沽成球面值貨，大戶大戶！咁幾時先會做吓好友？

石泳傑去舊迎新組合<br>北京首通石泳傑稱，不少股友沽貨過年，抱着輸少當贏的心態。

石泳傑去舊迎新組合
北京首通石泳傑稱，不少股友沽貨過年，抱着輸少當贏的心態。

石：我諗起碼都要等三至四月先可以正式入貨，美國首季再加息機會大，所以我會想等大市回調至20,000點樓下先考慮買貨，即使港股市盈率低，但係就見唔到有新資金嚟炒，主要都係內地資金居多，香港人對港股死晒心，低位先會入吓滙豐控股（00005）……我自己要等港股冇咁多創業板股份上市，同埋上市公司質素有改善先會放心買，你知啦，有啲上市唔夠3個月就發盈警，嚇死人咩！

石：另外，我留意緊科技金融類同「互聯網+」概念股，內地市場非常睇好，大路啲就係騰訊控股（00700），不過唔少股友都沽貨過年，抱輸少當贏嘅心態，我自己未揀得定啊。

散戶代表：市恐回調速掟水泥

仁：散戶阿仁

Kitty：你之前趁侵侵當選美國總統，買落一系列資源股，應該夠你過肥年，割咗禾青未先？

仁：侵侵之前吹水吹到個政綱咁勁，搞到基建同金融股升到嘭嘭聲，其實到佢上任咗都未必係咁行，又或者未必做到出嚟，而且港股23,000至24,000點阻力大，美股嗰邊又似頂頂哋，估計港、美大市都好大機會回調，所以我一月頭開始不斷減持資源股，當中有水泥股同埋中國石油化工股份（00386）等，呢部分佔我九成倉位，依家已經沽清晒等過年，未來要睇特朗普落實政綱，有明確方向先再睇餸食飯，到時先再入貨。