Market Insight：水泥股有勢接力炒

破位不成 先行收爐

美國大選至今，美股上半場係威係勢，升到個個唔信，到去年十二月中進入下半場，兩萬點兩攻不破，道指於三百幾點波幅內悶足個幾月，上周資金流報告可見，狂人登基前一周，美股基金淨流出金額創大選後新高，華爾街齊齊奉行不明朗揸現金的投資格言，到上周五見到個天無跌落嚟，炒番浸上去一啲唔出奇。

講就兇狠，到落手落腳做，特朗普政綱幾多可以兌現，天曉得，大打民緒牌，開口埋口美國優先，即使貿易戰得個講字，單係無休無止的口水戰，中港股市都無乜着數，假如今、明兩日恒指在23,100點關口前依舊三頂不破，炒鬼提早兩日收爐應該都無咩損失。

貿易戰之下邊個最傷成近日悶市之中難得的討論題目，就中國每4蚊美金出口美國，先由美國進口1蚊美金貨品，狂人真係勁加關稅，中國跟手報復的話，牌面睇中國肯定會傷啲，製造出口賺美金的公司真係短期都要避一避。

潔淨能源受惠國策

基金唔同散戶，唔可以成個倉現金等運到，資金搵地方泊，因為被削上網電價，股價弱咗一排的新能源股，有機會炒番中國嚴厲治霧霾的古仔。從內地經濟見底的其中一項指標顯示，去年全國用電量升幅為5%，比前年的4.5%續有改善，火電污染嚴重，國策大力推動可再生能源。

龍源向上趨勢未變

去年，風電及光電新裝機組增長均較預期快，按現時進度，二○二○年內地光伏組裝電量將遠超105GW的國家目標，去到133GW，發電技術改進加上機組容量拓展比預期快，現時光伏股高增長兼估值偏低，無疑提供理想上車機會，近排見股價最早在去年十一月的5.63元見底的龍源電力（00916），有一浪高於一浪之勢，企住6.2至6.5元水平，後市值得睇番好啲。

同時，鋼鐵股最近相當強勢，炒去產能、周期復甦之下，馬鞍山鋼鐵（00323）及鞍鋼股份（00347）雙雙返到逾一年半高位。

潤泥金隅隨時開車

水泥股有機會成為下一個炒作目標，上個星期大市牛皮，惟個別股份卻有睇頭，行業龍頭安徽海螺水泥（00914）上周五逆市升1%，且創52周新高。該股舊年年底跌至20.55元後呈V形反彈，上周連升四個交易日，兼突破舊年四月以來的橫行阻力23.5元，後市應仍有運行。

水泥行業步入傳統淡季，加上新年臨近，好多工人都要提早返鄉下過年，工程停頓，需求有所下降。不過，水泥價格自舊年下半年回升，目前仍處高位，十一月至今維持平穩，企業盈利有望改善。近年行業一直去產能，在霧霾籠罩之下，有部分地區的廠房需要停產，有啲更長達幾個月，供應減少除咗有助改善供需關係，同時支撐住價格。

早前簽訂合作協議的華潤水泥（01313）及金隅股份（02009），亦係可留意的對象，兩者走勢均見改善。潤泥正醞釀突破50日線3.23元，而金隅上周五以大陽燭上升，收報2.89元，剛好在100日線的水平，不妨在兩股確認破位後小注買入，博彈返此前高位，分別為3.4元及3.1元。

古勝