絲絲廣場：TRUMP版威士忌拍賣貴逾倍
阿「侵侵」特朗普高調話要同脫歐英國貿易，同英國品牌Crossover嘅好處，查實佢自己已經享受緊。今個月一支就叫「TRUMP」嘅「侵侵」簽名版威士忌，乘住佢美國候任總統嘅人氣，拍賣成交價6,000英鎊（約5.6萬港元），高市場預期超過一倍！
支「TRUMP」係蘇格蘭嘅格蘭多納（GlenDronach）26年佳釀，裝瓶已經係一二年嘅事，今次係由加拿大買家投得。
睇番英國威士忌交易網站，格蘭多納30年佳釀都係1,000英鎊左右，25年更加只係385英鎊，得到「侵侵」簽名加持嘅26年，升價十倍以上！
威士忌指數8年漲3.5倍
罕有威士忌近年一直係投資回報最高類別之一。根據Rare Whisky Icon 100指數去年回報高達46%；如果由○八年底指數推出起計，8年累計回報高達3.5倍。
本地投資圈班老威專家，有人去年沽人仔換買威士忌賺到笑。香港離岸人民幣一六年總共貶5.78%，轉去買威真係「嗒得杯落」。絲絲點知？唔話你知。
余絲韻