魚缸趣譚：A股跌港股唔跟有原因
近日港股表現氣勢如虹，恒指自21,488點低位反彈近1,500點喇！究其原因，大概就是由於離岸人民幣價格於上周四凌晨時急升所致啦！而我於上周五的專欄已經提醒大家：「今朝有股就今朝追」仲話明唔使吼細價股，大如騰訊（00700）、友邦保險（01299）都一樣有得升呀！
事實勝於雄辯，假如你有於192元邊買入騰訊的話，連日上漲之後已經重返雙紅底行列啦！好市賺錢真係話咁易。不過，人民幣反彈點解唔係A股升而係只得港股升呢？A股唔升唔緊要，但使唔使日日跌先？唔通真係阿爺有性格，畀你估到仲係食神咩？
非也非也！實情A股近日連連下跌的罪魁禍首應該係IPO！話說去年A股總共有227宗IPO上市，籌集的資金總額達1,496億元人民幣，創了過去五年新高；不過，同期滬綜指就跌了12%，創業板仲跌成28%添！
IPO過多變咗壞事
IPO鎖水對股市唔係好事就係常識啦，點知今年的IPO上市原來仲快，唔知係咪同我於兩、三個月前寫過，中央加快審批「山卡啦」地區註冊的公司上市來協助地區脫貧有關呢？而近日於A股排隊上市的股份幾乎每日3家！普華永道仲話今年全年內地上市的IPO可達320至350宗，其中牽涉的集資額仲高達2,500億元人民幣添！
「侵侵」於周四凌晨的首次記者會上發言唔夠精警，累美匯指數應聲滑落。正路睇，美元回落應該對港股有利個喎。眼見恒指彈升1,500點而想開Put做淡的粉絲們，係咪應該忍忍手，又或瞌埋眼唔好理阿爺住，照揸住正股來等大戶擊殺23,200點的重熊呢？我個人覺得這個劇本應是大勢所趨喇！
富昌金融研究部總監 譚朗蔚（作者為註冊持牌人士）