Market Insight：聯想最壞時刻已過

自十一月「侵侵」爆冷勝選後，華爾街來一個「昨天的我打倒今天的我」，將佢成日亂噏嘢的歷史放輕，如要墨西哥磅水在邊界建牆，反而當佢「再世列根」，炒減稅及增加基建投資，創造就業的主張，結果美元、美股升到爆。

神經刀「侵侵」下周五宣誓就職，股匯債市的「特朗普經濟學」蜜月期到底可以玩到幾時？古勝認為已差不多進入倒數。唔信可以睇吓，即使道指作勢準備隨時衝上兩萬點關。睇返美匯指數，上月中開始在102至103.8之間，近日已縮返落嚟。

十年期美債孳息率表現大同小異，「侵侵」當選前喺1.8厘附近，炒到上2.62厘見頂，近半個月陰陰濕濕縮返落2.3至2.4厘邊。剩番美股一副不到兩萬心不死的姿態，未來一周會否跟隨匯債市出現轉角，大家要小心。

揀重磅內房夠穩陣

去年十月內地連環出招壓抑樓市升浪之後，第四季內地成交靜咗，一線城市樓價好似點咗穴一樣。去年內地經濟相當依賴樓市產業暢旺帶動，已唔係秘密，最近官方為一七年經濟定調，全年增幅唔差過舊年的6.7%好多，估今年有6.5%。潛台詞是樓價唔可以再狂升，同時政策上亦唔會收得太死。

中央始終要穩經濟，而三、四線去庫存亦要繼續落去，正是近期資金翻炒內房股的主要原因。話時話，中小型發展商在內銀「好天送傘，雨天收傘」的做法下，趁機補充土儲唔易，短期基金都係唔大唔炒，集中火力在華潤置地（01109）、中國海外（00688）等級數的巨無霸會比較穩妥。

業績有望谷底反彈

兩萬三關頂到冚，港股連升五日後終於要回，昨跌106點收報22,829點，主板成交632億元。近排恒指由21,488點低位累積升不少，唔少股友急不及待唱淡準備反手沽期指，但古勝又唔係睇得咁淡。

致力做大PC業務

近排聯想集團（00992）走勢唔錯，4.59元低位抽上嚟之後，橫行幾日再又爆發，昨升2.2%收報5.11元，見兩個多月新高。顧問機構Gartner估聯想第四季全球個人電腦（PC）市佔率再升外，聯想似乎未有放棄在PC市場上繼續其「紅海策略」，在高競爭低門檻的PC生意上做大個餅。

市傳佢睇中富士通及三星電子的PC業務，可能在今年首季有定案。舊年業績因為非經營損失，如移動業務的非現金費用，一次過反映晒出嚟，可以話已衰到貼地，嚟緊業績點都可以谷底反彈。一五年高位計跌超逾六成，否極泰來，5元支持力唔錯，短炒可留意吓。

古勝